قصور (رپورٹ: محمد وقاص اشرف)

پٹرولنگ پولیس ضلع قصور نے ماہ اکتوبر 2026 کے دوران شاہراہوں پر جرائم پیشہ عناصر، غیر قانونی سرگرمیوں اور ٹریفک قوانین کی خلاف ورزی کرنے والوں کے خلاف بھرپور کارروائیاں کرتے ہوئے مجموعی طور پر 460 مقدمات درج کیے ہیں۔
ایڈیشنل آئی جی پنجاب ہائی وے پٹرول اور ڈی آئی جی پنجاب ہائی وے پٹرول کے احکامات کی روشنی میں ریجنل آفیسر لاہور ریجن کی نگرانی میں کی جانے والی کارروائیوں کے دوران 12 اشتہاری ملزمان اور 24 عدالتی مفرور گرفتار کیے گئے، جبکہ 16 چوری شدہ گاڑیاں بھی برآمد کی گئیں۔
جاری کردہ اعداد و شمار کے مطابق اکتوبر میں غیر قانونی گیس سلنڈرز کے استعمال پر 204 مقدمات درج کیے گئے۔ منشیات کے خلاف کارروائی میں 1 مقدمہ درج کر کے 3 ہزار 180 گرام ہیروئن اور 4 لاکھ روپے نقدی برآمد کی گئی، جبکہ شراب کے 18 مقدمات میں مجموعی طور پر 331 لیٹر شراب برآمد ہوئی۔ اسی طرح غیر قانونی اسلحہ رکھنے پر 2 مقدمات درج کر کے پستول برآمد کیے گئے، تیز رفتاری اور غفلت سے ڈرائیونگ پر 186 مقدمات اور چوری شدہ گاڑیوں سے متعلق 2 مقدمات درج کیے گئے۔
ٹریفک قوانین پر عمل درآمد کے سلسلے میں بغیر ڈرائیونگ لائسنس ڈرائیونگ، ون وے کی خلاف ورزی، کم عمر ڈرائیورز اور بغیر ہیلمٹ موٹر سائیکل چلانے والوں کے خلاف بھی کارروائیاں کی گئیں۔ پٹرولنگ پولیس نے جدید الیکٹرانک پٹرولنگ پوسٹ (EPP) سسٹم کے ذریعے 1 لاکھ 62 ہزار 462 افراد اور 58 ہزار 179 گاڑیوں کی جانچ پڑتال کی۔
عوامی خدمت کے حوالے سے پٹرولنگ پولیس نے 434 افراد کو مختلف نوعیت کی مدد فراہم کی اور 2 گمشدہ افراد (ایک 8 سے 9 سالہ کم سن بچہ اور ذہنی توازن سے محروم ایک بزرگ شہری) کو بحفاظت ان کے ورثاء کے حوالے کیا، جبکہ شہریوں کی سہولت کے لیے 135 موٹر سائیکلوں کے فریش ریگولر ڈرائیونگ لائسنس بھی جاری کیے گئے۔
ترجمان پٹرولنگ پولیس ضلع قصور کے مطابق شہریوں کے جان و مال کے تحفظ اور شاہراہوں کو محفوظ بنانے کے لیے کارروائیاں جاری رہیں گی اور شہریوں سے ٹریفک قوانین کی پابندی و مشکوک سرگرمیوں کی اطلاع دینے کی اپیل کی گئی ہے۔

