آستانہ (انٹرنیشنل ڈیسک): قازقستان کے دارالحکومت آستانہ میں اُس وقت عجیب و غریب صورتحال پیدا ہو گئی جب ایک رہائشی عمارت کی کھڑکی سے نقدی سے بھرا ایک سوٹ کیس نیچے پھینک دیا گیا، جس کے نتیجے میں زمین پر ہر طرف ڈالر کے بنڈل بکھر گئے اور یوں محسوس ہوا جیسے واقعی آسمان سے ڈالر برس رہے ہوں۔
یہ حیران کن واقعہ عین اُسی وقت پیش آیا جب قازقستان کی قومی سلامتی کمیٹی کے انسدادِ بدعنوانی کے ادارے نے ملک کے دو نہایت اہم سرکاری اداروں کے سربراہان کو حراست میں لے لیا۔ گرفتار ہونے والوں میں قازقستان کے سرکاری دولت فنڈ "سمروک قازینا” کے سربراہ نورلان ژاکوپوف اور قومی ریلوے کمپنی "قازقستان تیمیر ژولی” کے چیئرمین یلژاس اوتنشیئف شامل ہیں، جن پر مبینہ طور پر بھاری رشوت لینے کی کوشش اور بدعنوانی کے الزامات عائد کیے گئے ہیں۔
حکا کی جانب سے تاحال اس بات کی باضابطہ تصدیق نہیں کی گئی کہ کھڑکی سے پھینکے جانے والے سوٹ کیس اور بکھرے ہوئے ڈالروں کا ان اعلیٰ عہدیداروں کی گرفتاری سے براہِ راست کوئی تعلق ہے یا نہیں۔ تاہم، عوامی حلقوں میں یہ بات واضح طور پر کہی جا رہی ہے کہ یہ رقم جس کسی کی بھی تھی، وہ رنگے ہاتھوں پکڑے جانے کے خوف سے کسی بھی صورت اس "ثبوت” کے ساتھ پکڑا نہیں جانا چاہتا تھا۔
تحقیقاتی اداروں کا کہنا ہے کہ واقعے کے تمام پہلوؤں کا باریک بینی سے جائزہ لیا جا رہا ہے اور مزید تفصیلات تفتیش مکمل ہونے کے بعد سامنے لائی جائیں گی۔