طبعیت کی خرابی ،پاکستان تحریک انصاف کے وائس چئیرمین شاہ محمود قریشی پی آئی سی منتقل،

لاہور: پاکستان تحریک انصاف کے وائس چیئرمین اور سابق وزیر خارجہ شاہ محمود قریشی کو طبی معائنے اور مختلف ٹیسٹوں کے لیے کوٹ لکھپت جیل سے پنجاب انسٹی ٹیوٹ آف کارڈیالوجی (پی آئی سی) منتقل کر دیا گیا ہے۔
ذرائع کے مطابق چند روز قبل جیل میں قیام کے دوران شاہ محمود قریشی کی اچانک طبیعت خراب ہوگئی تھی۔ وہ اپنی بیرک میں چہل قدمی کر رہے تھے کہ اچانک چکر آنے کے باعث زمین پر گر پڑے۔
ذرائع کا کہنا ہے کہ گرنے کے نتیجے میں شاہ محمود قریشی کے جسم کے مختلف حصوں پر چوٹیں آئیں، جبکہ ان کے گھٹنے اور بازو پر بھی شدید چوٹیں لگیں۔واقعے کے فوری بعد جیل حکام نے انہیں ابتدائی طبی امداد فراہم کی اور ان کے خون کے نمونے حاصل کرکے تجزیے کے لیے شوکت خانم ہسپتال بھجوا دیے تھے۔
تاہم اب سابق وزیر خارجہ کو مزید تفصیلی طبی معائنے اور ضروری ٹیسٹوں کے لیے پنجاب انسٹی ٹیوٹ آف کارڈیالوجی منتقل کیا گیا ہے، جہاں ماہر ڈاکٹرز ان کا طبی معائنہ کر رہے ہیں۔