بالی: انڈونیشیا کے سیاحتی جزیرے بالی میں جسم پر مکمل یا بڑے سائز کے ٹیٹو بنوانے کا ایک ایسا خطرناک رجحان سامنے آیا ہے جسے طبی ماہرین نے ‘ہارر ٹرینڈ’ قرار دیا ہے۔
سیاح درد سے بچنے کے لیے آپریشن تھیٹر میں بیہوشی کی حالت (جنرل اینستھیزیا) میں گھنٹوں طویل سیشنز کے ذریعے پورے جسم پر ٹیٹو بنوا رہے ہیں۔
عالمی میڈیا رپورٹس کے مطابق، بالی میں تیزی سے مقبول ہونے والے اس مہنگے ترین ٹرینڈ کے تحت سیاح 9 ہزار سے 16 ہزار امریکی ڈالر تک کی بھاری رقم ادا کر رہے ہیں۔ اس کے بدلے میں اسپتالوں کے آپریشن تھیٹرز میں 10 سے 20 گھنٹے طویل سیشنز کے دوران ایک ہی وقت میں کئی ٹیٹو آرٹسٹ مریض (سیاح) کو مکمل بے ہوش کر کے جسم پر نقش و نگار بناتے ہیں۔
سوشل میڈیا پر وائرل ہونے والی ویڈیوز کے بعد بالی کے حکام نے اس خطرناک اور جان لیوا رجحان کا سختی سے نوٹس لیتے ہوئے باضابطہ تحقیقات کا آغاز کر دیا ہے۔
آسٹریلیا اور دیگر ممالک کے تجربہ کار ٹیٹو آرٹسٹوں اور طبی ماہرین نے اس عمل کو شدید تنقید کا نشانہ بناتے ہوئے اسے "غیر ضروری اور جان لیوا” قرار دیا ہے۔
ماہرین کا کہنا ہے کہ جنرل اینستھیزیا کا استعمال صرف اور صرف ضروری بڑی سرجریوں کے لیے ہوتا ہے۔ محض ایک شوق یا آرٹ کے لیے مصنوعی طریقے سے بیہوش ہونا دل کی دھڑکنے کی رفتار میں گڑبڑ، سانس کی شدید کمی، الرجک ری ایکشن اور بعض صورتوں میں کارڈیک اریسٹ یا موت جیسے جان لیوا خطرات کو دعوت دینے کے مترادف ہے۔
طبی حلقوں کا کہنا ہے کہ بے ہوشی کی حالت میں جسم کو پہنچنے والے صدمے اور انفیکشن کا بروقت اندازہ نہیں لگایا جا سکتا، یہی وجہ ہے کہ اب بالی انتظامیہ نے اس غیر قانونی اور خطرناک طبی لاپرواہی پر قابو پانے کے لیے سخت اقدامات اٹھانے کا تہیہ کر لیا ہے۔