سیالکوٹ (بیورو رپورٹ۔سلیم احمد اعوان شیخو)
کمشنر گوجرانوالہ ڈویژن محمد علی نے ڈپٹی کمشنر سیالکوٹ اویس مشتاق کے ہمراہ گورنمنٹ علامہ اقبال میموریل ٹیچنگ ہسپتال سیالکوٹ کا دورہ کیا۔ اس موقع پر انہوں نے ہسپتال میں مریضوں کو فراہم کی جانے والی طبی سہولیات، علاج معالجے کے انتظامات اور مختلف شعبہ جات کی کارکردگی کا تفصیلی جائزہ لیا۔
دورے کے دوران کمشنر گوجرانوالہ نے ہسپتال کے ایمرجنسی، سی ٹی سکین اور دیگر اہم طبی شعبہ جات کا معائنہ کیا۔ انہوں نے زیر علاج مریضوں اور ان کے لواحقین سے براہ راست ملاقات کی اور ان سے علاج معالجے کے معیار، طبی سہولیات اور عملے کے رویے کے بارے میں دریافت کیا۔ کمشنر نے اس بات پر زور دیا کہ مریضوں کو معیاری طبی سہولیات کی فراہمی اولین ترجیح ہے اور ہسپتال کے انتظامی امور کو مزید بہتر بنایا جائے۔
بعد ازاں، کمشنر اور ڈپٹی کمشنر نے کمشنر روڈ پر زیر تعمیر نئے ٹیچنگ ہسپتال کا بھی دورہ کیا۔ متعلقہ حکام نے انہیں منصوبے کی اب تک کی پیش رفت، تعمیراتی سرگرمیوں اور مستقبل میں فراہم کی جانے والی طبی سہولیات پر تفصیلی بریفنگ دی۔
حکام نے بتایا کہ یہ اہم منصوبہ تقریباً 9 ارب روپے کی لاگت سے مکمل کیا جا رہا ہے، جو کہ 300 بستروں پر مشتمل ہوگا۔ اس جدید ہسپتال میں آؤٹ پیشنٹ ڈیپارٹمنٹ (OPD)، میڈیکل و سرجیکل آئی سی یوز اور 28 بستروں پر مشتمل پلاسٹک سرجری و برن یون سمیت تمام جدید طبی سہولیات میسر ہوں گی۔
اس منصوبے کی تکمیل سے نہ صرف سیالکوٹ بلکہ گردونواح کے عوام کو علاج معالجے، تشخیص اور جدید طبی خدمات میں نمایاں سہولت ملے گی، بلکہ علاقے میں طبی تعلیم و تربیت کے شعبے کو بھی مزید تقویت حاصل ہوگی۔
