اسلام آباد:
صدرِ مملکت آصف علی زرداری اور وزیراعظم محمد شہباز شریف نے ہندوؤں کے مذہبی تہوار دیوالی کے پُر مسرت موقع پر دنیا بھر بالخصوص پاکستان میں مقیم ہندو برادری کو دِلی مبارکباد اور نیک تمناؤں کا اظہار کیا ہے۔اپنے الگ الگ پیغامات میں صدرِ مملکت اور وزیراعظم نے اس بات پر زور دیا کہ پاکستان کی ہندو برادری قومی زندگی کا ایک لازمی اور اہم حصہ ہے۔صدر مملکت آصف علی زرداری نے اپنے پیغام میں کہا کہ ملک کی سماجی، ثقافتی اور اقتصادی ترقی میں ہندو برادری کی خدمات لائقِ تحسین ہیں۔ معاشرے میں متنوع ثقافتی اور مذہبی روایات ایک قابلِ قدر معاشرتی اثاثہ ہیں جو ملک کو مضبوط بناتی ہیں۔ انہوں نے اس عزم کا اعادہ کیا کہ پاکستان میں تمام اقلیتوں کو یکساں حقوق اور مذہبی آزادی حاصل ہے۔وزیراعظم محمد شہباز شریف نے دیوالی کے موقع پر مبارکباد دیتے ہوئے کہا کہ روشنیوں کا یہ تہوار امن، رواداری اور باہمی احترام کا درس دیتا ہے۔ انہوں نے کہا کہ پاکستان اپنی مذہبی و ثقافتی تنوع پر فخر کرتا ہے اور حکومتِ پاکستان اقلیتوں کے حقوق کے تحفظ اور قومی دھارے میں ان کی شمولیت کو مزید موثر بنانے کے لیے پرعزم ہے۔وزیراعظم نے دعا کی کہ دیوالی کا یہ تہوار پاکستان سمیت دنیا بھر میں بسنے والے تمام افراد کے لیے امن، صحت، خوشیوں اور خوشحالی کا پیغام لے کر آئے۔