مٹیاری رپورٹ: عامر علی انڑ
مٹیاری کی تحصیل اوڈیرو لال اسٹیشن کے نواحی گاؤں جڑیو کھوسو کے رہائشیوں نے مقتول رستم کھوسو کے قاتلوں کی عدم گرفتاری کے خلاف پریس کلب کے سامنے شدید احتجاجی مظاہرہ کیا ہے۔
مظاہرے میں مقتول کے ورثاء اور دیگر علاقہ مکینوں نور محمد کھوسو، محمد طاہر کھوسو، عنایت کھوسو اور دیگر نے میڈیا سے گفتگو کرتے ہوئے بتایا کہ رستم کھوسو کے قتل کو تین ماہ کا عرصہ گزر چکا ہے، لیکن تاحال ایک بھی ملزم گرفتار نہیں ہو سکا۔ انہوں نے الزام عائد کیا کہ شاہپور درپور پولیس ملزمان کی پشت پناہی کر رہی ہے اور انہیں قانون کے کٹہرے میں لانے میں مجرمانہ غفلت کا مظاہرہ کر رہی ہے۔
مظاہرین کا کہنا تھا کہ مقدمے سے دستبردار ہونے کے لیے مبینہ ملزمان کی جانب سے انہیں مسلسل جانی و مالی نقصان پہنچانے کی دھمکیاں دی جا رہی ہیں، جس کے باعث پورے خاندان کو شدید خوف و ہراس اور جان کے لاحق خطرات کا سامنا ہے۔
مظاہرین نے نامزد مرکزی ملزمان وہاب کھوسو، مجیب کھوسو اور ان کے ساتھیوں سلیمان کھوسو، حفیظ کھوسو، عبدالرحمان کھوسو، فیاض کھوسو، ریاض کھوسو، فضل الرحمان کھوسو اور اویس کھوسو کے خلاف فوری قانونی کارروائی کا مطالبہ کیا۔
مظاہرین نے آئی جی سندھ، ڈی آئی جی حیدرآباد اور دیگر اعلیٰ حکام سے پرزور مطالبہ کیا ہے کہ رستم کھوسو کے قتل میں نامزد تمام ملزمان کو فوری گرفتار کر کے کڑی سزا دی جائے اور ورثاء کو انصاف کی فراہمی کے ساتھ ساتھ ان کی جان و مال کا تحفظ یقینی بنایا جائے۔