سیالکوٹ ( سلیم احمد اعوان شیخو)
لاہور ہائی کورٹ کی چیف جسٹس عالیہ نیلم کے فلاحی اور اصلاحی وژن کے تحت ڈائریکٹوریٹ آف ڈسٹرکٹ جوڈیشری نے صوبہ پنجاب کے تمام ڈسٹرکٹ اینڈ سیشن ججز، سول اور فیملی ججز کی عدالتوں کے لیے ایک اہم اور تاریخی حکم نامہ جاری کر دیا ہے۔جاری کردہ احکامات کے مطابق صوبہ بھر کی عدالتوں، بالخصوص فیملی عدالتوں میں قرآن کریم کی سورۃ النساء کی آیات نمبر 35 اور 128 اور ان کا ترجمہ نمایاں طور پر ڈسپلے (آویزاں) کرنے کا حکم دیا گیا ہے۔قانونی اور سماجی حلقوں کی جانب سے اس اقدام کو بھرپور انداز میں سراہا جا رہا ہے۔ ماہرین کا کہنا ہے کہ فیملی کورٹس میں خاندانی تنازعات، صلح جوئی اور میاں بیوی کے حقوق و فرائض سے متعلق ان قرآنی آیات کی موجودگی سائلین اور فریقین کو قرآنی تعلیمات کی روشنی میں صلح اور معاملات کو خوش اسلوبی سے سلجھانے کی ترغیب دے گی، جس سے معاشرتی فلاح اور خاندانی نظام کو مضبوط بنانے میں مدد ملے گی۔