سیالکوٹ (بیورو رپورٹ۔سلیم احمد اعوان شیخو)
ڈپٹی کمشنر سیالکوٹ محمد اویس مشتاق نے تحصیل ہیڈ کوارٹر ہسپتال کوٹلی لوہاراں کا اچانک دورہ کیا اور ہسپتال میں مریضوں کو فراہم کی جانے والی طبی سہولیات، ادویات کی دستیابی اور ڈاکٹرز و طبی عملے کی کارکردگی کا تفصیلی جائزہ لیا۔دورے کے دوران انہوں نے ایمرجنسی سمیت ہسپتال کے مختلف شعبوں کا معائنہ کیا اور ادویات کے سٹاک کا بھی باریک بینی سے جائزہ لیا۔ اس دوران ڈپٹی کمشنر نے زیر علاج مریضوں سے ملاقات کی اور انہیں فراہم کی جانے والی ادویات، علاج معالجے کے معیار اور ڈاکٹروں و طبی عملے کے رویے کے بارے میں براہ راست دریافت کیا۔ انہوں نے مریضوں سے فیڈ بیک حاصل کرتے ہوئے ہسپتال میں طبی سہولیات کے معیار کو مزید بہتر بنانے پر زور دیا۔اس موقع پر گفتگو کرتے ہوئے ڈپٹی کمشنر نے کہا کہ وزیر اعلیٰ پنجاب مریم نواز شریف کے وژن کے مطابق سرکاری ہسپتالوں کے اچانک دوروں کا بنیادی مقصد طبی سہولیات کی فراہمی، ادویات کی دستیابی اور طبی عملے کی کارکردگی کی مؤثر نگرانی کو یقینی بنانا ہے، تاکہ شہریوں کو سرکاری علاج گاہوں میں معیاری اور بروقت طبی سہولیات میسر آ سکیں۔ وزیر اعلیٰ مریم نواز شریف کے وژن کے مطابق سرکاری علاج گاہوں میں عوام کو بہترین سہولیات فراہم کی جا رہی ہیں اور انتظامی افسران ان سہولیات کا مسلسل جائزہ لیتے ہیں تاکہ اگر کہیں پر کوئی خلل موجود ہو تو اسے فوری طور پر ختم کیا جا سکے۔ انہوں نے اس عزم کا اعادہ کیا کہ مختلف اوقات میں سرکاری علاج گاہوں کے اچانک دورے جاری رہیں گے تاکہ صحت عامہ کے شعبے میں جاری حکومتی اقدامات کا اصل فائدہ عام عوام تک پہنچ سکے۔