نئی دہلی/دہرادون:
بھارت کی ریاست اتراکھنڈ کے ضلع چمولی میں جوشی مٹھ اور بدری ناتھ دھام کے قریب (ہاتھی پربت کے نزدیک) ایک بڑا فضائی حادثہ پیش آیا ہے، جس کے نتیجے میں ہیلی کاپٹر میں سوار پائلٹ سمیت تمام 6 افراد کے جاں بحق ہونے کی تصدیق کر دی گئی ہے۔موصولہ اطلاعات کے مطابق، یہ ہیلی کاپٹر بدری ناتھ دھام سے یاتریوں کو لے کر واپس آ رہا تھا کہ اچانک خراب موسم، شدید برفباری اور کم حدِ نگاہ (Visibility) کی وجہ سے حادثے کا شکار ہو کر گر گیا۔ حادثے کے فوراً بعد علاقے میں کہرام مچ گیا اور انتظامیہ نے فوری طور پر امدادی کارروائیاں شروع کر دیں۔ حادثے کی اطلاع ملتے ہی ریاستی اور ضلعی انتظامیہ، اسٹیٹ ڈیزاسٹر رسپانس فورس (SDRF) اور پولیس کی ٹیمیں فوری طور پر جائے وقوعہ پر روانہ کر دی گئیں۔ حکام کا کہنا ہے کہ دشوار گزار پہاڑی راستہ اور شدید برفباری ہونے کی وجہ سے امدادی کاموں میں شدید مشکلات کا سامنا کرنا پڑا، تاہم ریسکیو ٹیموں نے تمام لاشوں کو ملبے سے باہر نکال لیا ہے۔
مقامی انتظامیہ نے حادثے کی وجوہات کی جانچ کے لیے اعلیٰ سطحی تحقیقات کا حکم دے دیا ہے تاکہ اس بات کا تعین کیا جا سکے کہ آیا حادثے کی بنیادی وجہ صرف خراب موسم تھا یا کوئی تکنیکی خرابی بھی اس کا سبب بنی۔