صنعا:یمن کے حوثی باغی گروپ نے عدن ایئرپورٹ پر ایک طاقتور بیلسٹک میزائل سے حملہ کیا ہے، جس کے نتیجے میں پورے علاقے میں خوف و ہراس پھیل گیا اور ایک زور دار دھماکے کی آواز دور دور تک سنی گئی۔
عرب میڈیا کی رپورٹس کے مطابق میزائل حملے کے فوراً بعد سیکیورٹی فورسز، پولیس اور ریسکیو و امدادی ٹیمیں فوری طور پر جائے وقوعہ پر پہنچ گئیں، جبکہ حفاظتی اقدامات کے پیش نظر ایئرپورٹ کے اطراف فضائی و زمینی سرگرمیاں عارضی طور پر متاثر ہوئی ہیں۔ ابتدائی اطلاعات کے مطابق اس میزائل حملے کے نتیجے میں کسی بھی جانی نقصان کی فوری طور پر سرکاری یا طبی ذرائع سے تصدیق نہیں ہو سکی ہے، جبکہ متعلقہ ادارے نقصان کا تخمینہ لگانے میں مصروف ہیں۔
