نوابشاھ (بیورورپورٹ نفیس آرائیں): نوابشاہ کے قریب نواب ولی محمد شہر میں دو ٹرالرز کے درمیان تصادم کا واقعہ پیش آیا ہے، جس کے نتیجے میں ایک ٹرالر کا ڈرائیور زخمی ہوگیا۔
تفصیلات کے مطابق نواب ولی محمد شہر میں ایک ٹرالر کے ڈرائیور نے سڑک پر اچانک آنے والی بھینس کو بچانے کے لیے یکدم بریک لگائی، جس کے باعث پیچھے سے آنے والا دوسرا ٹرالر بے قابو ہو کر اس سے جا ٹکرایا۔ حادثہ اس قدر شدید تھا کہ دونوں ٹرالرز کے ڈرائیور اور کلینر اندر ہی پھنس گئے۔
واقعے کی اطلاع ملتے ہی مقامی شہریوں اور پولیس نے فوری طور پر امدادی کارروائیاں شروع کیں اور ٹرالر کے حصوں کو کاٹ کر اس میں پھنسے ہوئے افراد کو باہر نکالا۔
حادثے میں ٹرالر کا کلینر معجزانہ طور پر محفوظ رہا، تاہم زخمی ڈرائیور نور الٰہی چاچڑ (جو کہ پنجاب کے علاقے کوٹ سبزل کے رہائشی ہیں) کو شدید چوٹیں آئیں، جنہیں فوری طور پر طبی امداد کے لیے تعلقہ اسپتال قاضی احمد منتقل کردیا گیا۔