-
میڈرڈ/ٹولیڈو: اسپین کے وسطی صوبے ٹولیڈو میں ہائی اسپیڈ ٹرینوں کا ایک بڑا حادثہ پیش آیا ہے، جہاں دو مسافر ٹرینیں آپس میں ٹکرا گئی ہیں۔ اس خوفناک تصادم کے نتیجے میں ابتدائی اطلاعات کے مطابق کم از کم 10 افراد جاں بحق جبکہ متعدد زخمی ہو گئے ہیں۔
رپورٹس کے مطابق یہ حادثہ دارالحکومت میڈرڈ کو جنوبی علاقے اندلوسیا (Andalusia) سے ملانے والے ہائی اسپیڈ ریل روٹ پر پیش آیا۔ تصادم کی زد میں آنے والی ٹرینوں میں سرکاری رینفی (Renfe) اور پرائیویٹ آئریو (Iryo) کی ٹرینیں شامل ہیں، جن میں مجموعی طور پر 500 سے زائد مسافر سوار تھے۔ حادثے کے نتیجے میں ٹرین کی متعدد بوگیاں پٹڑی سے اتر کر نیچے جا گریں۔
واقعہ کے بعد ریلوے انفراسٹرکچر مینیجر (ADIF) نے میڈرڈ اور اندلوسیا کے درمیان تمام ہائی اسپیڈ ریل سروسز کو عارضی طور پر معطل کر دیا ہے۔
اطلاع ملتے ہی ریسکیو ٹیمیں، پولیس اور ایمبولینسز فوری طور پر جائے وقوعہ پر پہنچ گئیں اور زخمیوں کو قریبی اسپتالوں میں منتقل کیا جا رہا ہے۔ حکام کا کہنا ہے کہ متعدد مسافروں کی حالت تشویشناک ہونے کے باعث ہلاکتوں میں اضافے کا خدشہ ہے۔
اسپین کے وزیر اعظم پیڈرو سانچیز (Pedro Sánchez) نے اس دلخراش واقعے پر گہرے دکھ اور صدمے کا اظہار کیا ہے۔ سماجی رابطے کی ویب سائٹ ‘ایکس’ پر اپنے بیان میں انہوں نے جاں بحق ہونے والوں کے لواحقین سے تعزیت کا اظہار کرتے ہوئے کہا کہ متاثرین کو ہر ممکن طبی اور امدادی معاونت فراہم کی جا رہی ہے۔
