ممبئی: معروف بھارتی گلوکارہ اور نیشنل ایوارڈ یافتہ آرٹسٹ شلپا راؤ کے ساتھ ممبئی میں منعقدہ ‘بالی ووڈ میوزک پروجیکٹ’ (BMP) کی دسویں سالگرہ کی تقریب کے دوران ایک انتہائی ناخوشگوار واقعہ پیش آیا ہے۔ لائیو پرفارمنس کے دوران تکنیکی خرابی اور انتظامی بدحیاتی کی وجہ سے اچانک ان کا مائیک بند کر دیا گیا، جس پر وہ اسٹیج پر شدید جذباتی ہو گئیں۔واقعے کے بعد شلپا راؤ نے اپنے آفیشل انسٹاگرام اکاؤنٹ پر ایک جذباتی بیان جاری کیا۔ انہوں نے اپنے پیغام میں لکھا:
"ممبئی، آج رات میرے دل کا ایک چھوٹا سا حصہ ٹوٹ گیا ہے۔ اتنی خوبصورت چیز کا اس طرح ہم سے چھن جانا بہت تکلیف دیتا ہے۔ لیکن جب موسیقی رک گئی، تب بھی آپ (مداح) نہیں رکے۔ جس طرح آپ میرا نام پکارتے رہے، آپ کی آوازوں میں جو پیار تھا، میں وہ سب محسوس کر سکتی تھی۔ آج رات ہماری کہانی ادھوری رہ گئی، مگر میں وعدہ کرتی ہوں کہ واپس آؤں گی۔”
کنسرٹ کے دوران ایک م متاز فنکارہ کے ساتھ اس قسم کے رویے پر سوشل میڈیا پر شدید غم و غصہ پایا گیا۔ مداحوں اور ساتھی فنکاروں نے منتظمین کی ناقص ٹائم مینیجمنٹ اور بدانتظامی کو کڑی تنقید کا نشانہ بنایا، جبکہ سوشل میڈیا پر #JusticeForShilpaRao کا ہیش ٹیگ بھی ٹرینڈ کرنے لگا۔
شدید عوامی تنقید کے بعد ایونٹ کے آرگنائزرز نے باضابطہ طور پر معافی مانگتے ہوئے وضاحت کی کہ تقریب طے شدہ وقت سے پیچھے چل رہی تھی اور مقامی حکام کے مقرر کردہ کرفیو و ضوابط کی وجہ سے انہیں مجبوری میں پرفارمنس کو وقت سے پہلے ختم کرنا پڑا۔