سیالکوٹ (سلیم احمد اعوان شیخو)
صوبائی وزیر کھیل، امور نوجوانان و توانائی فیصل ایوب کھوکھر نے سیالکوٹ چیمبر آف کامرس اینڈ انڈسٹری کا خصوصی دورہ کیا اور صدر چیمبر خاور حسین سپال کی سربراہی میں بزنس کمیونٹی کے نمائندوں سے اہم ملاقات کی۔ ملاقات کے دوران وزیراعلیٰ پنجاب یوتھ گیمز، توانائی کے شعبے میں حکومتی اقدامات، مقامی صنعت کے فروغ اور کاروباری برادری کو درپیش چیلنجز پر تفصیلی تبادلہ خیال کیا گیا۔اس موقع پر گفتگو کرتے ہوئے صوبائی وزیر فیصل ایوب کھوکھر نے کہا کہ "وزیراعلیٰ پنجاب یوتھ گیمز” کے ذریعے نوجوانوں کو کھیلوں کے میدان میں آگے بڑھنے اور اپنی صلاحیتوں کے جوہر دکھانے کے بہترین مواقع فراہم کیے جا رہے ہیں۔ انہوں نے انکشاف کیا کہ ان گیمز میں گنیز بک آف ورلڈ ریکارڈ قائم کرنے کا ہدف مقرر کیا گیا ہے تاکہ نوجوانوں کی مثبت سرگرمیوں کو فروغ مل سکے۔صوبائی وزیر نے اس بات پر زور دیا کہ حکومت مقامی صنعت اور "میڈ اِن پاکستان” مصنوعات کو اولین ترجیح دے رہی ہے تاکہ ملکی پیداوار میں اضافہ اور کاروباری سرگرمیوں کو تقویت مل سکے۔ مہنگی بجلی کو صنعتی شعبے کا ایک بڑا مسئلہ قرار دیتے ہوئے انہوں نے کہا کہ حکومت اس ضمن میں صنعت کاروں کی قابلِ عمل تجاویز کا خیرمقدم کرتی ہے، تاکہ توانائی کے بحران سے نمٹنے کے لیے مؤثر اقدامات کیے جا سکیں۔ انہوں نے بتایا کہ پنجاب میں نئے بزنس ہبز اور بزنس زونز قائم کیے جا رہے ہیں جہاں صنعتوں کو سستی گرین انرجی فراہم کی جائے گی تاکہ کاروباری لاگت میں کمی لائی جا سکے۔ کھیلوں کے بنیادی ڈھانچے کا ذکر کرتے ہوئے انہوں نے بتایا کہ 35 سال سے التوا کا شکار اسکواش کورٹ کا منصوبہ محض ڈیڑھ سال میں مکمل کر لیا گیا ہے جو کہ حکومتی کارکردگی کا منہ بولتا ثبوت ہے۔سیالکوٹ چیمبر آف کامرس کے صدر خاور حسین سپال نے صوبائی وزیر کی آمد پر شکریہ ادا کرتے ہوئے وزیراعلیٰ پنجاب مریم نواز شریف کی قیادت میں کاروباری برادری کے لیے کیے جانے والے اقدامات کو سراہا۔ انہوں نے امید ظاہر کی کہ حکومت اور صنعت کاروں کے باہمی اشتراک اور مضبوط رابطوں سے صنعتی ترقی، بہتر سہولیات اور توانائی کے مسائل کا مستقل حل نکالا جا سکے گا۔