پاکپتن (بیورو رپورٹ)
ریجنل پولیس آفیسر (آر پی او) ساہیوال محمد ایاز سلیم نے پاکپتن کا دورہ کیا، جہاں انہوں نے تھانہ صدر پاکپتن اور تھانہ فرید نگر میں کھلی کچہری کا انعقاد کیا۔
دورے کے دوران آر پی او نے شہریوں سے براہِ راست ملاقات کی اور ان کے مسائل و شکایات بغور سنیں۔کھلی کچہری کے موقع پر آر پی او محمد ایاز سلیم نے متعلقہ پولیس افسران کو سخت ہدایات جاری کرتے ہوئے کہا کہ شہریوں کے تمام مسائل کو ترجیحی بنیادوں پر حل کیا جائے اور موصول ہونے والی ہر درخواست پر قانون اور میرٹ کے مطابق فوری کارروائی یقینی بنائی جائے۔ انہوں نے اس بات پر زور دیا کہ عوام اور پولیس کے درمیان فاصلوں کو کم کرنے اور بروقت انصاف کی فراہمی کے لیے فیلڈ وزٹس کا سلسلہ باقاعدگی سے جاری رکھا جائے گا۔بعد ازاں، آر پی او ساہیوال نے تھانہ فرید نگر کا اچانک دورہ کیا اور تھانے کے انتظامی امور، روزمرہ ریکارڈ اور پولیس کی مجموعی کارکردگی کا تفصیلی جائزہ لیا۔ انسپکشن کے دوران انہوں نے ہدایت کی کہ تھانے میں آنے والے سائلین اور شہریوں کو بروقت رہنمائی اور تمام ممکنہ سہولیات فراہم کی جائیں، جبکہ تفتیشی عمل میں مکمل شفافیت اور پیشہ ورانہ معیار کو ہر صورت برقرار رکھا جائے۔آر پی او محمد ایاز سلیم کا کہنا تھا کہ شہریوں کی جان و مال کا تحفظ، عوامی شکایات کا ازالہ اور پولیس احتساب موجودہ پولیس پالیسی کا بنیادی محور ہے، اور اس پر کسی قسم کا سمجھوتہ نہیں کیا جائے گا۔