سکھر (رپورٹ: عبد الرحمان راجپوت)
عدالتِ عالیہ کے سخت احکامات اور ڈپٹی کمشنر سکھر کی ہدایات پر ضلعی انتظامیہ نے شہر بھر میں گرینڈ آپریشن کرتے ہوئے رہائشی علاقوں کو غیر قانونی مویشی باڑوں سے مکمل طور پر پاک کر دیا ہے۔اسسٹنٹ کمشنر نیو سکھر، بشریٰ منصور کی زیرِ قیادت سکھر میونسپل کارپوریشن اور ضلعی پولیس پر مشتمل مشترکہ ٹیموں نے سکھر سٹی اور نیو سکھر کے مختلف حساس علاقوں میں دھاوا بول دیا۔ کارروائی کے دوران رہائشی آبادیوں میں قانون کی دھجیاں اڑاتے ہوئے قائم کیے گئے تمام غیر قانونی مویشی باڑے مسمار کر دیے گئے۔انتظامی حکام نے موقع پر موجود باڑوں کے مالکان کو سخت ترین الفاظ میں تنبیہ کی ہے کہ وہ آئندہ کسی بھی قیمت پر شہری اور رہائشی علاقوں میں مویشی ہرگز نہ رکھیں، ورنہ ان کے خلاف مزید آہنی ہاتھوں سے نمٹا جائے گا۔ اسسٹنٹ کمشنر بشریٰ منصور نے دوٹوک انداز میں واضح کیا کہ عدالتی احکامات کی پاسداری ہر صورت یقینی بنائی جائے گی اور شہر میں کسی کو بھی قانون کی خلاف ورزی کی اجازت نہیں دی جائے گی۔شہری حلقوں کی جانب سے اس مشترکہ اور مدلل کارروائی کو انتہائی سراہا جا رہا ہے، جبکہ انتظامیہ کا عزم ہے کہ شہر کا امن، صفائی اور انتظامی نظم و ضبط بحال رکھنے کے لیے ایسی کارروائیاں بلا تعطل جاری رہیں گی۔