سیالکوٹ (سلیم احمد اعوان شیخو)
کمشنر گوجرانوالہ ڈویژن محمد علی نے اسسٹنٹ کمشنر تحصیل سمبڑیال کے دفتر میں ایک بڑی کھلی کچہری کا انعقاد کیا۔ اس موقع پر ڈپٹی کمشنر سیالکوٹ اویس مشتاق، ایڈیشنل ڈپٹی کمشنر ریونیو عباس ذوالقرنین اور اسسٹنٹ کمشنر سمبڑیال عدنان بشیر بھی موجود تھے۔کھلی کچہری میں شہریوں اور تحصیل بار ایسوسی ایشن سمبڑیال کے عہدیداروں نے ریونیو، محکمہ مال، ستھرا پنجاب، میونسپل کمیٹی، ضلع کونسل، زراعت اور دیگر محکموں سے متعلق اپنی شکایات اور درخواستیں پیش کیں۔ کمشنر محمد علی نے تمام درخواستیں ذاتی طور پر وصول کیں اور متعلقہ افسران کو فوری طلب کرکے ان کے ازالے کے احکامات جاری کیے۔اس موقع پر گفتگو کرتے ہوئے کمشنر محمد علی نے کہا کہ وزیراعلیٰ پنجاب مریم نواز شریف کی ہدایت پر کھلی کچہریوں کا انعقاد کیا جا رہا ہے تاکہ عوام کو ان کی دہلیز پر ریلیف فراہم کیا جا سکے۔ انہوں نے تمام افسران کو ہدایت کی کہ وہ روزانہ کی بنیاد پر اپنے دفاتر میں شہریوں کے مسائل سنیں، درخواستوں پر عمل درآمد کو یقینی بنائیں اور کارکردگی کی باقاعدہ رپورٹ پیش کریں تاکہ عوامی شکایات کا مؤثر اور بروقت حل ممکن ہو سکے۔