ٹانک (بیورو رپورٹ)
خیبرپختونخوا کے 12 اضلاع میں ایمرجنسی کے نفاذ کے پیشِ نظر عوامی حلقوں نے گورنر خیبرپختونخوا فیصل کریم کنڈی سے پُر زور مطالبہ کیا ہے کہ وہ وفاق کے نمائندے کی حیثیت سے وفاقی حکومت اور متعلقہ بجلی حکام کے ساتھ فوری رابطہ کرکے متاثرہ اضلاع میں بجلی کی طویل اور غیر اعلانیہ لوڈشیڈنگ کا دورانیہ کم کرانے کے لیے مؤثر اور کلیدی کردار ادا کریں۔عوامی حلقوں کا کہنا ہے کہ ایمرجنسی سے متاثرہ اضلاع کے مکین پہلے ہی غیر معمولی حالات اور متعدد سنگین مشکلات سے دوچار ہیں، ایسے میں طویل لوڈشیڈنگ نے شہریوں کی پریشانیوں میں مزید اضافہ کر دیا ہے۔ موجودہ کٹھن حالات میں عوام کو ریلیف فراہم کرنا حکومت اور متعلقہ اداروں کی اولین ترجیح ہونی چاہیے۔شہریوں نے اس بات پر زور دیا کہ گورنر خیبرپختونخوا فیصل کریم کنڈی وفاق اور صوبے کے درمیان ایک پُل کا کردار ادا کرتے ہیں۔ لہٰذا، وہ اس اہم عوامی مسئلے کو وفاقی حکومت، وزارتِ توانائی اور پیسکو کے اعلیٰ حکام کے سامنے پُر اثر انداز میں اٹھائیں تاکہ متاثرہ تمام 12 اضلاع میں بجلی کی فراہمی کو بہتر بنایا جا سکے اور لوڈشیڈنگ میں فوری کمی کے لیے عملی اقدامات یقینی بنائے جائیں۔متاثرہ اضلاع کے عوام نے مزید مطالبہ کیا کہ موجودہ غیر معمولی صورتحال کے پیشِ نظر ان علاقوں کو خصوصی ریلیف دیا جائے، تاکہ گھریلو صارفین، تاجروں، طلبہ، مریضوں اور دیگر طبقے سے تعلق رکھنے والے شہریوں کو درپیش مشکلات میں کمی لائی جا سکے۔عوامی حلقوں نے ایک بار پھر اپیل کی ہے کہ گورنر خیبرپختونخوا اس معاملے کا فوری نوٹس لیں اور وفاقی حکومت سے خصوصی ریلیف کی منظوری کے لیے اقدامات کریں تاکہ عوام کو بجلی کے اس عذاب سے نجات مل سکے۔