صوفیہ:ویب ڈیسک
تل ابیب سے آسٹریا کے دارالحکومت ویانا جانے والی ایک مسافر پرواز کو سکیورٹی الرٹ اور بم کی دھمکی ملنے کے بعد بلغاریہ کے صوفیہ ایئرپورٹ پر ہنگامی طور پر اتار لیا گیا۔بین الاقوامی میڈیا رپورٹس کے مطابق، پرواز کو اڑان کے دوران مبینہ طور پر بم کی دھمکی موصول ہوئی، جس کے بعد پائلٹ نے فوری طور پر متعلقہ حکام سے رابطہ کیا اور حفاظتی اقدامات کے تحت طیارے کو قریبی ایئرپورٹ یعنی بلغاریہ کے صوفیہ ایئرپورٹ پر باحفاظت لینڈ کرایا گیا۔طیارے کے زمین پر اترنے کے فوری بعد سکیورٹی فورسز، بم ڈسپوزل اسکواڈ اور ایئرپورٹ کی ہنگامی ٹیمیں حرکت میں آ گئیں۔ حکام کی جانب سے مسافروں کو بحفاظت باہر نکال کر طیارے کی مکمل تلاشی اور جانچ پڑتال کا عمل شروع کر دیا گیا ہے تاکہ سکیورٹی کو یقینی بنایا جا سکے۔ واقعے کے بعد ایئرپورٹ پر سکیورٹی کے انتہائی سخت انتظامات کیے گئے ہیں۔