سیالکوٹ (سلیم احمد اعوان شیخو)
ڈپٹی کمشنر سیالکوٹ محمد اویس مشتاق کی ہدایت پر سیالکوٹ چیمبر آف کامرس اینڈ انڈسٹری میں بزنس فیسلیٹیشن ڈیسک کا باقاعدہ افتتاح کر دیا گیا ہے۔ اس فیسلیٹیشن ڈیسک کا افتتاح ایڈیشنل ڈپٹی کمشنر (ہیڈ کوارٹرز اینڈ انفورسمنٹ) صولت حیات وٹو نے کیا۔ اس موقع پر صدر سیالکوٹ چیمبر آف کامرس اینڈ انڈسٹری خاور حسین سپال اور چیمبر کے دیگر عہدیداران بھی موجود تھے۔سیالکوٹ کی کاروباری برادری کو سرکاری محکموں سے متعلق امور میں مؤثر معاونت فراہم کرنا۔ مسائل کے حل کے لیے رابطہ کاری کو آسان بنانا اور شکایات کے بروقت ازالے کو یقینی بنانا۔ کاروباری افراد کو متعلقہ صوبائی محکموں سے رابطے، ضروری اجازت ناموں اور دیگر کاروباری امور میں رہنمائی فراہم کرنا۔واضح رہے کہ ڈپٹی کمشنر اویس مشتاق نے گزشتہ جمعہ کو سیالکوٹ چیمبر آف کامرس اینڈ انڈسٹری کے دورے کے دوران کاروباری برادری کے مسائل کے حل اور کاروبار دوست ماحول کے فروغ کے لیے اس ڈیسک کے قیام کا اعلان کیا تھا۔اعلان کے مطابق ایڈیشنل ڈپٹی کمشنر (ہیڈ کوارٹرز اینڈ انفورسمنٹ) صولت حیات وٹو ضلعی انتظامیہ اور کاروباری برادری کے درمیان رابطے کے لیے فوکل پرسن ہوں گے، جبکہ متعلقہ عملے کی تعیناتی کے ذریعے سہولت کاری کے عمل کو مزید مؤثر بنایا جائے گا۔ضلعی انتظامیہ کا بنیادی مقصد سیالکوٹ کی صنعتی و تجارتی برادری کے ساتھ قریبی اور مؤثر رابطہ برقرار رکھتے ہوئے کاروباری مسائل کا حل، سرکاری خدمات تک آسان رسائی اور صنعتی سرگرمیوں کے فروغ کے لیے ایک سازگار ماحول فراہم کرنا ہے۔ یہ بزنس فیسلیٹیشن ڈیسک انتظامیہ اور چیمبر آف کامرس کے درمیان باہمی تعاون کو مزید مستحکم کرنے میں اہم کردار ادا کرے گا۔