ملتان: کراچی سے پشاور جانے والی مسافر ٹرین رحمان بابا ایکسپریس شیر شاہ پل کے قریب شدید حادثے کا شکار ہو گئی ہے، جس کے نتیجے میں ٹرین کی تمام بوگیاں پٹری سے اتر گئی ہیں۔ حادثے میں ابتدائی اطلاعات کے مطابق 5 افراد جاں بحق جبکہ 30 سے زائد مسافر زخمی ہو گئے ہیں۔تمام زخمیوں اور لاشوں کو فوری طور پر نشتر اسپتال ملتان منتقل کر دیا گیا ہے، جہاں ایمرجنسی نافذ کر دی گئی ہے۔ ریلوے ذرائع کے مطابق یہ دلخراش حادثہ صبح کے وقت پیش آیا۔حادثے کی اطلاع ملتے ہی ریسکیو 1122، پولیس اور ریلوے حکام کی ٹیمیں فوری طور پر جائے وقوعہ پر پہنچ گئیں اور امدادی کارروائیاں شروع کر دی ہیں۔ ٹریک کی بحالی اور پھنسی ہوئی بوگیوں کو ہٹانے کے لیے ملتان سے ریلیف ٹرین اور ہیوی مشینری کو بھی طلب کر لیا گیا ہے۔دریں اثنا، اعلیٰ حکام نے واقعے کا سخت نوٹس لیتے ہوئے حادثے کی وجوہات جاننے کے لیے انکوائری کمیٹی تشکیل دینے کی ہدایت جاری کر دی ہے تاکہ غفلت برتنے والوں کے خلاف قانونی کارروائی کی جا سکے۔
ملتان: رحمان بابا ایکسپریس حادثے کا شکار، 5 افراد جاں بحق، 30 سے زائد زخمی
