سرگودھا (راجہ نورالہی عاطف سے)
نیشنل کمیشن فار ہیومن ڈویلپمنٹ (NCHD) ضلع سرگودھا اور محکمہ جیل خانہ جات کے اشتراک سے ڈسٹرکٹ جیل سرگودھا میں "عالمی یومِ ذہنی صحت” کے موقع پر ایک خصوصی آگاہی سیمنار کا انعقاد کیا گیا۔ تقریب کا بنیادی مقصد قیدیوں اور معاشرے میں ذہنی صحت کی اہمیت اجاگر کرنا اور اس سے متعلق شعور بیدار کرنا تھا۔تقریب کے مہمانِ خصوصی ڈی آئی جی جیل خانہ جات سرگودھا ریجن سعید اللّہ گوندل تھے۔ جب کہ دیگر معزز مہمانانِ گرامی میں مہر عمر دراز جھاوری (ڈپٹی ڈائریکٹر NCHD سرگودھا)، وحید خان (سپرنٹینڈنٹ ڈسٹرکٹ جیل سرگودھا)، مختار احمد مرزا (صدر روٹری کلب سرگودھا)، ڈاکٹر ماورا (ماہر نفسیات ڈسٹرکٹ جیل سرگودھا)، آصف علی تارڑ (اسسٹنٹ ڈائریکٹر ایجوکیشن NCHD)، پروفیسر ڈاکٹر نجمہ اقبال (چیئرپرسن شعبہ نفسیات یونیورسٹی آف سرگودھا)، ڈاکٹر عائشہ (ڈائریکٹر سپیشل ایجوکیشن سرگودھا)، میڈم روبینہ مختار (چیئرپرسن وومن چیمبر آف کامرس اینڈ انڈسٹریز سرگودھا)، NCHD کے فیلڈ افسران، جیل انتظامیہ اور اسیران (مردانہ و زنانہ) کی کثیر تعداد نے شرکت کی اس موقع پر خیالات کا اظہار کرتے ہوئے ڈی آئی جی جیل خانہ جات سعید اللّہ گوندل کا کہنا تھا کہ ذہنی صحت بھی جسمانی صحت کی مانند مساوی توجہ کی متقاضی ہے۔ مریض کو توجہ سے سننے اور سمجھنے کا احساس اس میں زندگی کی طرف لوٹنے کی امید پیدا کرتا ہے اور شفا یابی کے عمل کو تیز بناتا ہے۔ڈپٹی ڈائریکٹر NCHD مہر عمر دراز جھاوری نے کہا کہ صحت کا مطلب صرف بیماری کا نہ ہونا نہیں بلکہ جسمانی، ذہنی اور سماجی تندرستی ہے۔ صحت کو واقعی سب کا حق بنانے کے لیے حکومتوں، اداروں اور افراد کو مل کر کردار ادا کرنا ہوگا۔سپرنٹینڈنٹ ڈسٹرکٹ جیل وحید خان، صدر روٹری کلب مختار احمد مرزا، ماہر نفسیات ڈاکٹر ماورا، پروفیسر ڈاکٹر نجمہ اقبال، ڈاکٹر عائشہ اور میڈم روبینہ مختار نے بھی تقریب سے خطاب کیا۔ مقررین نے ذہنی تناؤ کی وجوہات، اس کے منفی اثرات (جیسے بے چینی، ڈپریشن، یادداشت اور ارتکاز میں کمی)، اور اس سے نمٹنے کی مؤثر حکمت عملیوں (جیسے ورزش، مراقبہ، کاؤنسلنگ اور سماجی معاونت) پر تفصیلی روشنی ڈالی۔تقریب کے اختتام پر معزز مہمانانِ گرامی نے شجرکاری مہم کے تحت ڈسٹرکٹ جیل کے اندر مختلف اقسام کے پودے لگا کر شجرکاری مہم کا باقاعدہ آغاز کیا۔