ہولناک طوفان ’ایسائیاس‘ کی امریکی ریاستوں میں تباہ کاری: 105 میل فی گھنٹہ تیز ہوائیں، لاکھوں بجلی سے محروم، نظامِ زندگی مفلوج

فلوریڈا : کیٹیگری 2 کا ہولناک سمندری طوفان ’ایسائیاس‘ (Isaias) امریکہ کی خلیجی ساحلی پٹی (Gulf Coast) سے ٹکرا گیا ہے، جس کے نتیجے میں فلوریڈا، الاباما اور ارد گرد کے علاقوں میں تباہ کن ہواؤں، شدید بارشوں، سیلابی صورتحال اور خطرناک سمندری لہروں نے تباہی مچا دی ہے۔
قومی طوفان مرکز (NHC) کے مطابق طوفان کا مرکزی حصہ فلوریڈا کے شہر ڈسٹن (Destin) کے قریب ساحل سے ٹکرایا، اس وقت ہواؤں کی رفتار 105 میل فی گھنٹہ (169 کلومیٹر فی گھنٹہ) ریکارڈ کی گئی۔ طوفان ساحل سے ٹکرانے سے قبل کیٹیگری 3 سے قدرے کمزور ہو کر کیٹیگری 2 میں داخل ہوا تھا، تاہم اس کی شدت اب بھی انتہائی مہلک ہے۔
فلوریڈا کے گورنر رون ڈی سینٹس نے شہریوں کو خبردار کرتے ہوئے کہا ہے کہ:”طوفان پہنچ چکا ہے، شہری جہاں ہیں وہیں محفوط رہیں اور سڑکوں پر نکلنے سے مکمل پرہیز کریں۔ فلیش فلڈنگ پورے علاقے کے لیے شدید خطرہ ہے۔
"پینساکولا (Pensacola) اور دیگر علاقوں میں شدید ہواؤں کی وجہ سے مکانات کی چھتیں اڑ گئیں، درخت اور بجلی کے پول اکھڑ گئے۔ اب تک فلوریڈا اور الاباما میں 5 لاکھ سے زائد صارفین بجلی کی سہولت سے محروم ہو چکے ہیں۔ صورتحال کی سنگینی کو دیکھتے ہوئے فلوریڈا، الاباما اور مسی سیپی کے گورنرز نے ایمرجنسی نافذ کر دی ہے، جبکہ فلوریڈا نیشنل گارڈ کے 5,000 سے زائد اہلکار امدادی کارروائیوں کے لیے تعینات کر دیے گئے ہیں۔
امریکی صدر ڈونلڈ ٹرمپ نے بھی وائٹ ہاؤس سے جاری بیان میں کہا کہ انتظامیہ طوفان کی صورتحال پر باریک بینی سے نظر رکھے ہوئے ہے۔ صدر ٹرمپ نے الاباما کے لیے فیڈرل ایمرجنسی کے اعلا ن کی منظوری بھی دے دی ہے تاکہ امدادی کاموں میں حائل رکاوٹوں کو ختم کیا جا سکے۔
طوفان کے باعث خلیج میکسیکو میں واقع تیل اور گیس کی پیداواری تنصیبات کو عارضی طور پر بند کر دیا گیا ہے، جو امریکی خام تیل کی مجموعی سالانہ پیداوار کا تقریباً 15 فیصد حصہ فراہم کرتی ہیں۔ اس کے علاوہ پین ہینڈل کے تمام ایئرپورٹس پر پروازیں معطل کر دی گئی ہیں۔دلچسپ اور تشویشناک بات یہ ہے کہ خطے میں شدید ترین طوفان کا اندازہ لگانے کے لیے مشہور فوڈ چین "وافل ہاؤس” (Waffle House) کی درجنوں برانچیں بھی بند کر دی گئی ہیں۔ مقامی شہریوں کا کہنا ہے کہ وافل ہاؤس کا بند ہونا اس بات کا واضح ثبوت ہے کہ طوفان کتنا تباہ کن ہے۔محکمہ موسمیات کے مطابق طوفان ویک اینڈ کے دوران الباما سے ہوتا ہوا ٹینیسی ویلی کی طرف بڑھے گا، جہاں مزید شدید بارشوں اور ٹورنیڈو (بگولے) اٹھنے کے شدید خطرات موجود ہیں۔