مورو (رپورٹ: محمد اسلم مغل)
مورو شہر کی لطیف کالونی میں دو بچیوں کی ماں ثوبیہ عباسی نے شوہر کی زیادتیوں سے تنگ آ کر مبینہ طور پر زہر کھا کر خودکشی کر لی۔اطلاع ملنے پر مورو پولیس نے جائے وقوعہ پر پہنچ کر لاش کو تحویل میں لیا اور پوسٹ مارٹم کے لیے مورو اسپتال منتقل کر دیا۔متوفیہ کے والد محمد یونس عباسی نے بتایا کہ ان کی بیٹی پر شوہر اور سسرالی اہلخانہ تشدد کرتے تھے، جس سے تنگ آ کر وہ میکے منتقل ہو گئی تھی اور اس نے عدالت میں خلع کا کیس دائر کر رکھا تھا۔ انہوں نے الزام عائد کیا کہ شوہر زاہد عباسی اور اس کے گھر والے فون پر دھمکیاں دے کر بیٹی کو شدید ذہنی ٹارچر کرتے تھے، جس کے باعث اس نے پریشان ہو کر اپنی زندگی کا خاتمہ کر لیا۔ والد نے بیٹی کی موت کا ذمہ دار شوہر اور اس کے گھر والوں کو قرار دیتے ہوئے ان کے خلاف سخت قانونی کارروائی اور انصاف کا مطالبہ کیا ہے۔دوسری جانب، پولیس کا کہنا ہے کہ واقعے کی تمام پہلوؤں سے مکمل تفتیش کی جا رہی ہے اور حقائق سامنے آنے پر قانونی قدم اٹھایا جائے گا۔ متوفیہ کے والد کی مدعیت میں شوہر زاہد عباسی اور اس کے گھر والوں کے خلاف رپورٹ درج کر لی گئی ہے۔