پی ٹی آئی لانگ مارچ: مولانا فضل الرحمان کی ثالثی، حکومتی پیشکش کے بعد پی ٹی آئی کا ہنگامی اجلاس

اسلام آباد (ویب ڈیسک): پاکستان تحریک انصاف (پی ٹی آئی) کے لانگ مارچ اور سیاسی کشیدگی کے خاتمے کے لیے جمعیت علمائے اسلام (ف) کے سربراہ مولانا فضل الرحمان سیاسی میدان میں متحرک ہو گئے ہیں اور انہوں نے حکومتی پیشکش پی ٹی آئی قیادت تک پہنچا دی ہے۔ذرائع کے مطابق حکومتی وفد کی اہم ملاقات کے بعد مولانا فضل الرحمان نے پی ٹی آئی کی مرکزی قیادت سے ٹیلی فونک رابطہ کیا اور حکومت کا پیغام و پیشکش ان کے سامنے رکھی۔مولانا فضل الرحمان کے رابطہ کرنے کے فوراً بعد پی ٹی آئی نے صورتحال پر مشاورت کے لیے ہنگامی اجلاس طلب کر لیا۔ آن لائن (زوم) پر جاری اس اہم اجلاس میں پی ٹی آئی کی تمام مرکزی لیڈرشپ موجود ہے جہاں حکومتی پیشکش اور آئندہ کے لائحہ عمل پر تفصیلی غور کیا جا رہا ہے۔ ذرائع کا کہنا ہے کہ مولانا فضل الرحمان نے اس سے قبل حکومت کو سختی سے مشورہ دیا تھا کہ ملک میں گورنر راج یا ایمرجنسی لگانے کے بجائے تمام سیاسی مسائل کو افہام و تفہیم اور مذاکرات کے ذریعے حل کیا جائے۔ مولانا کے اس موقف کے بعد حکومت نے انہیں اپنا مثبت کردار ادا کرنے کی درخواست کی تھی۔واضح رہے کہ گزشتہ روز حکومت کی جانب سے اہم وفد، جس میں رانا ثناء اللہ، اسپیکر قومی اسمبلی ایاز صادق اور طارق فضل چوہدری شامل تھے، نے مولانا فضل الرحمان سے ملاقات کی تھی اور سیاسی بحران کے حل کے لیے ان سے تعاون مانگا تھا۔