ریاض اور ابہا کے ایئرپورٹس پر حملے، تین افراد جان سے گئے، پاکستانی شہری سمیت 36 زخمی

    ریاض :سعودی ایئرپورٹس پر ہونے والے دو حملوں میں دو خواتین سمیت تین افراد کی موت واقع ہوگئی۔ درجنوں افراد زخمی ہوئے ہیں جبکہ املاک کو بھی کچھ نقصان پہنچا۔
    ایس پی اے کے مطابق سعودی جنرل اتھارٹی آف سول ایوی ایشن نے بیان میں کہا کہ منگل اور بدھ کو ابہا انٹرنیشنل ایئرپورٹ اور ریاض کے کنگ خالد انٹرنیشنل ایئرپورٹ کو نشانہ بنایا گیا۔


    ایمرجنسی ریسپانس ٹیم اور متعلقہ حکام نے فوری طور پر واقعات کے بعد طے شدہ طریقہ کار کے مطابق کارروائی کی۔
    ابہا ایئرپورٹ پر منگل کو ہونے والے صریح حملے میں دو غیر ملکی خواتین جن کا تعلق مراکش اور الجزائر سے ہے جان سے گئیں جبکہ سعودی شہریوں سمیت 28 افراد زخمی ہوئے۔ زخمیوں مییں ایک بنگلہ دیشی اور ایک فلپائنی شامل ہے۔ان میں کچھ شدید زخمی ہیں۔


    ریاض کے کنگ خالد انٹرنیشنل ایئرپورٹ پر بدھ کو حملے میں ایک سوڈانی شہری کی موت واقع ہوگئی۔ پانچ سعودی شہریوں سمیت 8 افراد زخمی ہوئے۔ دیگر زخمیوں میں دو مصری شہری اور ایک پاکستانی شامل ہے۔
    بیان میں کہا گیا کہ تمام زخمیوں کو طبی امداد کے لیے ہسپتال منتقل کیا گیا ہے۔
    بیان میں کہا گیا کہ اتھارٹی متعلقہ حکام کے ساتھ مل کر نقصان کا تخمینہ لگانے اور مسافروں اور عملے کے تحفظ کو یقینی بنانے، مملکت کے سول ایوی ایشن سسٹم کی سکیورٹی کو برقرار رکھنے کے لیے ضروری اقدامات کر رہی ہے۔حوثی ملیشیا نے دعویٰ کیا ہے کہ ان کی جانب سے سعودی عرب کے اہم اہداف پر کیے گئے تازہ ترین ڈرون اور بیلسٹک میزائل حملے مکمل طور پر کامیاب رہے ہیں۔ گروپ کا کہنا ہے کہ انہوں نے دارالحکومت ریاض میں قائم شاہ خالد انٹرنیشنل ایئرپورٹ سمیت کئی ائیرپورٹس اور عسکری تنصیبات کو انتہائی "درستگی” کے ساتھ نشانہ بنایا ہے، جس سے فضائی ٹریفک بھی متاثر ہوئی۔
    تاہم دوسری جانب سعودی عرب کے سرکاری حکام نے تردید کرتے ہوئے واضح کیا ہے کہ دفاعی نظام نے کارروائی کرتے ہوئے ریاض کی جانب بڑھنے والے بیلسٹک میزائل کو فضا میں ہی کامیابی کے ساتھ انٹرسیپٹ (تباہ) کر کے ناکام بنا دیا۔

    Related Posts