سنگاپور اوپن سینیئر امیچر گالف چیمپئن شپ: پاکستان کے احمد ظفر حیات نے اوور آل ٹائٹل جیت لیا

سنگاپور (نیوز ڈیسک): پاکستان کے احمد ظفر حیات نے 35ویں سنگاپور اوپن سینیئر امیچر گالف چیمپئن شپ 2026ء کا اوور آل ٹائٹل اپنے نام کر کے عالمی سطح پر ملک کا نام روشن کر دیا ہے۔ سنگاپور کے سیلیٹر کنٹری کلب میں منعقدہ 3 روزہ چیمپئن شپ میں احمد ظفر حیات نے مسلسل بہترین کارکردگی کا مظاہرہ کرتے ہوئے تین راؤنڈز میں مجموعی طور پر 223 اسکور (73، 74، 76) حاصل کیے اور پہلی پوزیشن پر رہے۔اس چیمپئن شپ میں پاکستان کے ایک اور کھلاڑی بریگیڈیئر (ر) عمر اعجاز نے بھی شاندار کارکردگی کا مظاہرہ کیا اور مجموعی طور پر 229 اسکور (77، 80، 72) کے ساتھ تیسری پوزیشن حاصل کی۔ علاوہ ازیں پاکستان کے گالفر محمد احمد منان نے تین راؤنڈز میں 250 اسکور کیا۔پاکستان گالف فیڈریشن (PGF) نے سنگاپور میں پاکستانی گالفرز کی اس شاندار کامیابی پر احمد ظفر حیات اور دیگر کھلاڑیوں کو مبارکباد پیش کی ہے۔