ناگالینڈ کی فلم ’انگھ‘ نے ٹورنٹو فلم فیسٹیول میں بڑا اعزاز جیت لیا، آسکر کی دوڑ میں بھی شامل

    ٹورنٹو / نئی دہلی:بعض فلمیں صرف تفریح کا ذریعہ نہیں ہوتیں بلکہ اپنے ساتھ ایک پوری تہذیب، زبان اور خطے کو دنیا کے سامنے لے آتی ہیں۔ بھارت کی شمال مشرقی ریاست ناگالینڈ کے نوجوان فلم ساز تھیجا ریو کی پہلی فیچر فلم ’انگھ‘ (Angh) نے کینیڈا میں جاری نامور ٹورنٹو انٹرنیشنل فلم فیسٹیول (TIFF) کے باوقار پلیٹ فارم پرائز جیت کر عالمی سنیما میں ہلچل مچا دی ہے۔ اس شاندار کامیابی نے نہ صرف ناگالینڈ کی منفرد کونیاک (Konyak) ثقافت کو بین الاقوامی نقشے پر اجاگر کیا ہے بلکہ یہ فلم اب سنہ 2027 کے اکیڈمی ایوارڈز (آسکر) کی دوڑ میں بھی شامل ہونے کے لیے اہل ہو گئی ہے۔


    31 سالہ تھیجا ریو کی یہ پہلی فیچر فلم ایک ایسی کونیاک زبان میں بنائی گئی ہے جو خود بھارت کے 99 فیصد سے زیادہ لوگوں کے لیے بھی بالکل اجنبی ہے۔ فلم کی کہانی 1960 کی دہائی کے ناگالینڈ کے ایک دور افتادہ قبائلی گاؤں کی ہے، جہاں روایت اور جدیدیت آمنے سامنے ہیں۔ مقامی زبان میں ’انگھ‘ کا مطلب ’سربراہ‘ یا ’مکھیا‘ ہے۔ کہانی ایک عمر رسیدہ قبائلی سربراہ انگھبا کے گرد گھومتی ہے جو اپنی پرانی روایات سے جڑا رہنا چاہتا ہے، جبکہ ایک امریکی مشنری کی آمد اور مغربی اثرات اس معاشرے کو تیزی سے بدل رہے ہیں۔

    اس فلم کی خاص بات اس کا روایتی اندازِ پیش کش ہے جسے 16 ایم ایم فلم پر عکس بند کیا گیا ہے تاکہ ناظرین کو ایک پرانی اور خام دنیا کا حقیقی احساس مل سکے۔ فلم میں مقامی ناگا فن کاروں کے علاوہ برطانوی اداکار اور بافٹا ایوارڈ یافتہ ڈگلس ہینشل نے بھی اداکاری کے جوہر دکھائے ہیں۔
    اس سال ٹورنٹو فیسٹیول کے پلیٹ فارم مقابلے میں شامل یہ واحد بھارتی فلم تھی۔ جیوری نے فلم کے ترو تازہ نقطۂ نظر اور ایک ایسی دنیا کی طاقتور عکاسی کرنے پر بھرپور داد دی جس سے عالمی ناظرین عموماً ناواقف ہیں۔ فیسٹیول کے سربراہ کیمرون بیلی نے بھی اس کی انفرادیت کو سراہا۔ ایوارڈ وصول کرتے ہوئے ہدایت کار تھیجا ریو نے یہ اعزاز اپنے وطن کے لوگوں کے نام کرتے ہوئے کہا کہ وہ ایک ایسی جگہ سے تعلق رکھتے ہیں جہاں خواب شاذ و نادر ہی حقیقت بنتے ہیں، مگر یہ تو محض شروعات ہے۔ یہ فلم اب ناگالینڈ کی شناخت کو دنیا بھر میں زندہ و جاوید کرنے کا ذریعہ بن گئی ہے۔

    Related Posts