وائٹ ہاؤس: عدالت کے حکم کے باوجود میڈیا اداروں کو ریاستی عشائیے کی کوریج سے روک دیا گیا

واشنگٹن :امریکی نشریاتی اداروں سی این این (CNN)، ایم ایس ناؤ (MS NOW) اور پولیٹیکو (Politico) کے صحافیوں نے کہا ہے کہ وائٹ ہاؤس کے احاطے تک دوبارہ رسائی بحال کرنے کے عدالتی حکم کے باوجود انھیں ریاستی عشائیے کی کوریج سے روک دیا گیا۔
صدر ڈونلڈ ٹرمپ نے ہفتے کے روز ان تینوں امریکی میڈیا اداروں پر ’فیک نیوز‘ پھیلانے کا الزام عائد کرتے ہوئے ان کی وائٹ ہاؤس تک رسائی معطل کر دی تھی۔
جمعرات کی صبح ایک وفاقی جج کے رات گئے جاری کردہ فیصلے کے بعد ان اداروں کے صحافیوں کو دوبارہ وائٹ ہاؤس کے احاطے میں داخلے کی اجازت مل گئی۔ جج نے قرار دیا تھا کہ پابندی بظاہر امریکی آئین سے متصادم ہے اور انتظامیہ کو انہیں رسائی دینی چاہیے۔
تاہم تینوں اداروں نے شام کو بتایا کہ انھیں ریاستی عشائیے کی کوریج کی اجازت نہیں دی گئی۔
سی این این کے مطابق، ایک پریس کوآرڈینیٹر نے ان کے رپورٹر اور پروڈیوسر کو عشائیے میں داخل ہونے سے روک دیا اور کہا کہ وہ اس معاملے پر وائٹ ہاؤس کے کمیونیکیشنز ڈائریکٹر اسٹیون چیونگ سے رابطہ کریں۔
اس پیش رفت کے بارے میں ایم ایس ناؤ کے پروڈیوسر کائل گرفن کی ایکس پوسٹ کے جواب میں وائٹ ہاؤس کے ریپڈ ریسپانس اکاؤنٹ نے کہا کہ یہ عشائیہ "پیشگی منظوری یافتہ تقریب” تھا۔
وائٹ ہاؤس کے بیان میں کہا گیا ’فیک نیوز جو کچھ آپ کو باور کرانا چاہتی ہے، حقیقت اس کے برعکس ہے۔ ان اداروں کو یہ حق حاصل نہیں کہ وہ وائٹ ہاؤس کے ہر حصے، ہر تقریب اور ہر پریس ایونٹ تک آزادانہ رسائی حاصل کریں۔‘