ہسپتالوں میں طبی سہولیات کی مزید توسیع، جدید تشخیصی سہولیات اور نئے شعبہ جات کے قیام پر تفصیلی گفتگو
انورزیب خان پشاور
چیئرمین بورڈ آف گورنرز ایم ٹی آئی بنوں پروفیسر ڈاکٹر خالد محمود کی قیادت میں ایم ٹی آئی بنوں کی اعلیٰ قیادت کے وفد نے صوبائی وزیر صحت خیبر پختونخوا خلیق الرحمن سے ملاقات کی۔ ملاقات میں بنوں اور ملحقہ اضلاع کے عوام کو بہتر، بروقت اور جدید طبی سہولیات کی فراہمی، ہسپتالوں میں موجودہ شعبہ جات کی اپ گریڈیشن، نئی سہولیات کے قیام اور مختلف ترقیاتی منصوبوں پر تفصیلی تبادلہ خیال کیا گیا۔
وفد میں ہاسپٹل ڈائریکٹر ایم ٹی آئی بنوں پروفیسر ڈاکٹر عبدالغفور خان، میڈیکل ڈائریکٹر اسسٹنٹ پروفیسر ڈاکٹر فرمان اللہ وزیر اور سیکرٹری بورڈ آف گورنرز ایم ٹی آئی بنوں منیب خان شامل تھے۔
ملاقات کے دوران ایم ٹی آئی بنوں کے ہسپتالوں میں ایم آر آئی کی سہولت کے قیام، ڈی ایچ کیو ہسپتال بنوں کے ٹراما سنٹر کی توسیع، کڈنی سنٹر کے قیام سمیت مختلف شعبہ جات کی توسیع اور طبی سہولیات کو مزید بہتر بنانے کے امور زیرِ غور آئے۔ وفد نے صوبائی وزیر صحت کو ہسپتالوں میں جاری اور مجوزہ منصوبوں، مریضوں کی بڑھتی ہوئی ضروریات اور طبی خدمات کو مزید مؤثر بنانے کے لیے درکار اقدامات سے آگاہ کیا۔
اس موقع پر صوبائی وزیر صحت خلیق الرحمن نے کہا کہ بنوں سمیت ملحقہ اضلاع کے عوام کو جدید تشخیصی اور علاج کی سہولیات ان کے اپنے علاقے میں فراہم کرنا محکمہ صحت کی ترجیحات میں شامل ہے۔ انہوں نے کہا کہ ہسپتالوں میں مریضوں کی بڑھتی ہوئی تعداد اور عوامی ضروریات کو مدنظر رکھتے ہوئے طبی شعبہ جات اور سہولیات میں توسیع کے لیے قابلِ عمل اقدامات کیے جائیں گے۔
صوبائی وزیر صحت نے ایم ٹی آئی بنوں کی قیادت کو یقین دلایا کہ ہسپتالوں میں طبی سہولیات کی بہتری، ضروری ترقیاتی منصوبوں اور عوام کو معیاری علاج کی فراہمی کے لیے محکمہ صحت کی جانب سے ہر ممکن تعاون فراہم کیا جائے گا۔ انہوں نے متعلقہ حکام کو ضروری امور پر پیش رفت کے لیے مؤثر رابطہ کاری کی ہدایت بھی کی۔
ملاقات میں اس عزم کا اظہار کیا گیا کہ ایم ٹی آئی بنوں میں طبی سہولیات کی توسیع اور جدید شعبہ جات کے قیام کا مقصد بنوں اور ملحقہ اضلاع کے عوام کو بروقت، معیاری اور جدید طبی خدمات مقامی سطح پر فراہم کرنا اور مریضوں کو علاج کے لیے دور دراز علاقوں کا سفر کرنے کی ضرورت کو کم کرنا ہے۔