مکہ جوائنٹ ڈیفنس ایگریمنٹ کے تحت لیفٹیننٹ جنرل نعمان محمود (ر) پہلے سیکریٹری جنرل مقرر

ریاض+اسلام آباد+استنبول:مکہ جوائنٹ ڈیفنس ایگریمنٹ کے تحت لیفٹیننٹ جنرل نعمان محمود (ر) کو پہلا سیکریٹری جنرل مقرر کردیا گیا ہے۔ وہ ریاض میں قائم ہونے والے اتحاد کے جنرل سیکریٹریٹ کی قیادت کریں گے۔
مکہ جوائنٹ ڈیفنس ایگریمنٹ کے تحت پاکستان نے لیفٹیننٹ جنرل نعمان محمود (ر) کو اتحاد کا پہلا سیکریٹری جنرل مقرر کرنے کا اعلان کردیا ہے۔ اس تقرری کے ساتھ معاہدے کے تحت قائم کیے جانے والے ادارہ جاتی ڈھانچے کو عملی شکل دینے کا عمل آگے بڑھ گیا ہے۔
دفتر خارجہ کے مطابق لیفٹیننٹ جنرل نعمان محمود ریاض میں قائم کیے جانے والے جنرل سیکریٹریٹ کی سربراہی کریں گے۔ انہیں ہلالِ امتیاز (ملٹری) سے بھی نوازا جاچکا ہے۔
مکہ جوائنٹ ڈیفنس ایگریمنٹ پر پاکستان، سعودی عرب اور ترکیہ نے 7 اگست 2026 کو مکہ مکرمہ میں دستخط کیے تھے۔ معاہدے کا مقصد تینوں ممالک کے درمیان اجتماعی دفاع، سلامتی اور دفاعی تعاون کو مضبوط بنانا ہے۔
معاہدے میں یہ شق بھی شامل ہے کہ تینوں میں سے کسی ایک ملک پر مسلح حملہ تینوں پر حملہ تصور کیا جائے گا، جب کہ معاہدے کے تحت دفاعی تعاون کے مختلف شعبوں کو مزید فروغ دینے پر بھی اتفاق کیا گیا ہے۔
پاکستانی دفتر خارجہ نے معاہدے کو دفاعی نوعیت کا قرار دیتے ہوئے کہا تھا کہ یہ کسی ملک کے خلاف نہیں اور اس کا مقصد بیرونی جارحیت کے خلاف اجتماعی دفاعی صلاحیت اور باہمی تعاون کو مضبوط بنانا ہے۔
مکہ معاہدے کے تحت قائم ہونے والا جنرل سیکریٹریٹ تینوں ممالک کے درمیان دفاعی تعاون اور مشترکہ امور کے لیے مرکزی رابطہ اور انتظامی ڈھانچے کے طور پر کام کرے گا۔ اس کا قیام سعودی دارالحکومت ریاض میں عمل میں لایا جا رہا ہے۔