سیالکوٹ (سلیم احمد اعوان – نمائندہ خصوصی): پیزا شاپ کے ورکرز کے ساتھ ہونے والی ڈکیتی کا معاملہ حل ہو گیا، پولیس نے ڈکیتی کی سنگین واردات میں ملوث ملزمان کو گرفتار کر کے لوٹا گیا مال اور ناجائز اسلحہ برآمد کر لیا ہے۔
تفصیلات کے مطابق 8 ستمبر 2026ء کو تھانہ مراد پور کے علاقے گوہدپور میں پیزا شاپ پر کام کرنے والے ملازمین اپنی رہائش گاہ پر موجود تھے کہ مسلح ڈاکوؤں نے انہیں یرغمال بنا کر نقدی اور موبائل فونز چھین لیے اور فرار ہو گئے۔ واقعے کا مقدمہ متعلقہ تھانے میں درج کیا گیا تھا۔
ڈسٹرکٹ پولیس آفیسر (DPO) سیالکوٹ کیپٹن (ر) دوست محمد نے محنت کش لڑکوں کے ساتھ ہونے والی اس واردات کا سخت نوٹس لیتے ہوئے ڈی ایس پی صدر سرکل رانا ندیم طارق کو ملزمان کی فوری گرفتاری کا حکم دیا۔
ہدایت پر عمل کرتے ہوئے ایس ایچ او تھانہ مرادپور وقاص اکبر، سب انسپکٹر محمد احسان اور پولیس ٹیم نے جدید سائنسی بنیادوں پر سراغ لگا کر تینوں ڈاکوؤں ذوالقرنین، لقمان علی اور صائم مشتاق کو گرفتار کر لیا۔
پولیس کے مطابق گرفتار ملزمان کے قبضے سے چھینی گئی ہزاروں روپے کی نقدی، 5 عدد قیمتی موبائل فونز اور واردات میں استعمال ہونے والے 2 عدد ناجائز 30 بور پسٹل برآمد کر کے مزید قانونی کارروائی شروع کر دی گئی ہے۔