ممبئی: بالی ووڈ کی معروف اداکارہ کترینہ کیف سمیت کئی نامور شخصیات کو اپنے وزن میں کمی یا زیادتی کی وجہ سے سوشل میڈیا پر شدید ٹرولنگ اور باڈی شیمنگ کا سامنا کرنا پڑ رہا ہے۔
سوشل میڈیا پر اکثر معروف شخصیات کی جسمانی ساخت اور وزن میں معمولی تبدیلی پر بھی غیر ضروری تنقید شروع کر دی جاتی ہے۔ جب کسی اداکارہ کا وزن قدرے بڑھ جائے تو اسے حمل یا عدم توجہی کا طعنہ دیا جاتا ہے، اور اگر وہ اپنا وزن کم کر لیں تو بھی ان کی لک اور صحت پر سوالات اٹھائے جاتے ہیں۔
کترینہ کیف کی حال ہی میں سامنے آنے والی تصویر اور لک کے بعد سوشل میڈیا پر صارفین نے ان کی باڈی شیمنگ شروع کر دی، جس پر ان کے مداحوں نے شدید برہمی کا اظہار کیا۔ تاہم کترینہ کیف واحد اداکارہ نہیں ہیں، بلکہ ودیا بالن، ایشوریا رائے، اور سوناکشی سنہا جیسی کئی دیگر نامور شخصیات بھی مختلف اوقات میں اپنے وزن کی وجہ سے آن لائن ٹرولنگ کا نشانہ بن چکی ہیں۔
سنجیدہ حلقوں اور مداحوں کا کہنا ہے کہ فنکاروں کو ان کے کام اور فن سے پرکھا جانا چاہیے نہ کہ ان کی جسمانی ساخت یا وزن میں تبدیلی کی بنیاد پر تنقید کا نشانہ بنایا جائے۔