- عید میلاد النبیؐ کا جشن نصیب والے مناتے ہیں، محفلِ میلاد سے ڈاکٹر لیاقت علی خان کا خطاب
سرگودھا (راجہ نورالہی عاطف)
: سرگودھا پریس کلب میں جشنِ عید میلاد النبی صلی اللہ علیہ وآلہ وسلم کے سلسلے میں ایک پرنور محفل کا انعقاد کیا گیا، جس کی مناسبت سے پریس کلب کی عمارت کو دلہن کی طرح سجا دیا گیا۔
محفلِ میلاد النبیؐ کا اہتمام کمیٹی کے چیئرمین حاجی سلیم قادری، مدثر عباس پاشا اور حاجی منیر تبسم کی جانب سے کیا گیا، جنہوں نے شاندار انتظامات کیے۔ تقریب کے مہمانِ خصوصی ڈاکٹر لیاقت علی خان تھے، جبکہ دیگر مہمانانِ گرامی میں ملک اشرف برہان (برہان سٹی)، سید اعجاز حسین شیرازی (معروف ٹرانسپورٹر و رہنما پی پی پی) اور ملک شوکت مجید اعوان شامل تھے۔
سٹیج سیکرٹری کے فرائض پریس کلب کے جنرل سیکرٹری ملک کامران نے سر انجام دیے اور تمام معزز مہمانوں و شرکاء کا شکریہ ادا کیا۔ تقریب سے جامع مسجد عزیزیہ کے خطیب قاضی نگاہِ مصطفیٰ نے خصوصی خطاب کرتے ہوئے سیرتِ طیبہ کے مختلف پہلوؤ ں پر تفصیلی روشنی ڈالی۔
اس موقع پر مہمانِ خصوصی ڈاکٹر لیاقت علی خان نے پریس کلب انتظامیہ اور میلاد کمیٹی کی کاوشوں کو سراہتے ہوئے کہا کہ "جشنِ عید میلاد النبیؐ کا انعقاد اور شرکت نصیب والوں کو میسر ہوتی ہے۔” محفلِ پاک میں صحافیوں اور شہریوں کی کثیر تعداد نے شرکت کی۔