امریکا میں دہائیوں بعد ڈینگی وبا پھوٹ پڑی: فلوریڈا میں ضعیف خاتون جاں بحق،

میامی / فلوریڈا:امریکا کی ریاست فلوریڈا میں ڈینگی وائرس (Dengue Virus) نے ہولناک شکل اختیار کر لی ہے، جہاں ایک ضعیف العمر خاتون اس موذی بیماری کے باعث موت کے منہ میں چلی گئی ہیں۔ صحت کے حکام کے مطابق فلوریڈا میں کئی دہائیوں کے بعد ڈینگی کے کیسز میں اس قدر بڑا اور خطرناک اضافہ دیکھنے میں آیا ہے، جس نے طبی شعبے میں خطرے کی گھنٹی بجا دی ہے۔
ماہرین کا کہنا ہے کہ ریاست میں حالیہ موسمی حالات، بارشوں اور نمی نے وائرس پھیلانے والے مچھروں کی افزائش کے لیے انتہائی سازگار ماحول فراہم کیا ہے، جس کی وجہ سے انفیکشن تیزی سے پھیل رہا ہے۔
رپورٹس کے مطابق ماضی میں امریکا میں رپورٹ ہونے والے ڈینگی کے بیشتر کیسز ان مسافروں کے ہوتے تھے جو امریکہ سے باہر یا پورٹو ریکو کے سفر کے دوران اس وائرس کا شکار ہو کر آتے تھے۔ تاہم اب صورتحال یکسر بدل چکی ہے اور مقامی سطح پر مچھروں کے کاٹنے سے پھیلنے والا یہ وائرس براہ راست امریکی سرزمین پر لوگوں کو اپنی لپیٹ میں لے رہا ہے، جسے ماہرین نے تشویشناک قرار دیا ہے۔ حکام کی جانب سے متاثرہ علاقوں میں انسدادِ مچھر (Fumigation) کی ہنگامی کارروائیاں شروع کر دی گئی ہیں اور شہریوں کو احتیاطی تدابیر اختیار کرنے کی سخت ہدایت کی گئی ہے۔