دوران پرواز ہنگامہ آرائی: عملے نےمسافر کو سیٹ کے ساتھ باندھ دیا، ہنگامی لینڈنگ کرنا پڑ گئی

واشنگٹن:امریکن ایئرلائنز کی ایک پرواز کے دوران مسافر کی جانب سے شدید بدتمیزی اور ہنگامہ آرائی پرعملے نے مسافر پر قابو پانے کے لیے اسے ڈکٹ ٹیپ کی مدد سے سیٹ کے ساتھ سختی سے باندھ دیا۔
رپورٹس کے مطابق جمعرات کی شب امریکن ایئرلائنز کی پرواز AA618 فضا میں محوِ پرواز تھی کہ ایریزونا سے تعلق رکھنے والے 67 سالہ مسافر آرتھر لنڈین (Arthur Lundeen) نے طیارے کے اندر شدید ہنگامہ کھڑا کر دیا۔ صورتحال جب عملے کے قابو سے باہر ہونے لگی تو پائلٹ اور عملے نے فوری کارروائی کرتے ہوئے مسافر کے ہاتھ زپ ٹائیز (zip ties) سے جکڑ دیے اور اسے ڈکٹ ٹیپ کی مدد سے اس کی سیٹ کے ساتھ چپکا دیا تاکہ وہ مزید کسی نقصان کا سبب نہ بن سکے۔
مسافر کی اس حرکت کی وجہ سے پرواز کا رخ تبدیل کرنا پڑا، اور رات تقریباً 10:15 پر طیارے کو بالٹیمور واشنگٹن انٹرنیشنل (BWI) ایئرپورٹ پر ہنگامی بنیادوں پر اتارا گیا۔ طیارے کے زمین پر اترتے ہی میری لینڈ ٹرانسپورٹیشن اتھارٹی پولیس نے فوری کارروائی کرتے ہوئے ملزم آرتھر لنڈین کو حراست میں لے لیا۔ وفاقی ایوی ایشن ایڈمنسٹریشن (FAA) نے واقعے کی باضابطہ تحقیقات شروع کر دی ہیں۔