لاہور:پنجاب حکومت نے صوبے بھر سے بدعنوانی، کرپشن اور اختیارات کے ناجائز استعمال کے خاتمے کے لیے ایک انتہائی فیصلہ کن اور آہنی گھیرا تیار کرتے ہوئے گرینڈ آپریشن کا آغاز کر دیا ہے۔
وزیراعلیٰ پنجاب مریم نواز شریف نے کرپشن کے ناسور پر سختی سے قابو پانے کے لیے تمام محکموں میں سخت نگرانی کا نظام تشکیل دے دیا ہے، جس کے تحت کرپشن کے خلاف کارروائیاں براہِ راست ان کی ذاتی نگرانی میں کی جا رہی ہیں۔
🛑 All RPOs and DPOs are hereby directed to identify and take appropriate action against personnel involved in corrupt practices within their respective ranks and files. Failure to address such elements will invite strict punitive action against those responsible for negligence…
— Maryam Nawaz Sharif (@MaryamNSharif) September 3, 2026
حکومتی ہدایات کے مطابق صوبے میں کرپشن کے خلاف فوری اور خفیہ معلومات اکٹھی کرنے کے لیے ایک خصوصی "خفیہ سیل” قائم کر دیا گیا ہے، جہاں سے موصول ہونے والی رپورٹس بلا تاخیر براہِ راست وزیراعلیٰ کو پیش کی جا رہی ہیں۔ اس نیٹ ورک کے ذریعے کرپشن میں ملوث عناصر کی رنگے ہاتھوں گرفتاریوں کا سلسلہ بھی شروع ہو چکا ہے۔ اس کے علاوہ عوام کی سہولت اور شکایات کے فوری ازالے کے لیے خصوصی ہیلپ لائن "1350” قائم کی گئی ہے تاکہ شہری بلا جھجھک رشوت ستانی اور اختیارات سے تجاوز کی اطلاع دے سکیں۔
عوام کا پیسہ لوٹنے والوں کے لیے کوئی پناہ گاہ نہیں، مریم نواز شریف
اجلاس سے خطاب اور احکامات جاری کرتے ہوئے وزیراعلیٰ مریم نواز شریف نے دوٹوک الفاظ میں واضح کیا کہ اب پنجاب میں کرپشن کے لیے کوئی گنجائش، کوئی پناہ اور کوئی رعایت باقی نہیں بچی۔ انہوں نے کہا کہ "کرپشن صرف پیسے کی چوری نہیں، یہ دراصل عوام کے بنیادی حق اور ان کے اعتماد کی چوری ہے، اور جو ہاتھ عوام کے حق پر بڑھے گا، اس ہاتھ کو سختی سے روکا جائے گا۔”
وزیراعلیٰ نے اعلان کیا کہ ترقیاتی منصوبوں کے لیے جاری ہونے والی ایک ایک پائی کا شفاف استعمال یقینی بنایا جائے گا، اور لوٹی ہوئی پبلک منی کی مکمل ریکوری تک یہ آپریشن ہرگز نہیں روکا جائے گا۔ انہوں نے خبردار کیا کہ کرپشن کے سنگین مقدمات میں اب کوئی عہدہ، تعلق یا کسی قسم کی سفارش ملزموں کو قانون کے کٹہرے سے نہیں بچا سکے گی، اور عوام کا پیسہ خوردبرد کرنے والا ہر شخص سلاخوں کے پیچھے ہوگا۔ ترقیاتی منصوبوں کی شفافیت جانچنے کے لیے جدید مانیٹرنگ سسٹمز بروئے کار لائے جا رہے ہیں، جبکہ شاندار اور دیانتدارانہ کارکردگی دکھانے والوں کے لیے "سی ایم میرٹ بیج” کا اعلان بھی کیا گیا ہے۔