سیالکوٹ۔سلیم احمد اعوان شیخو
سیالکوٹ پولیس نے 27 سال بعد قتل کے مقدمہ میں ملوث مفرور اشتہاری ملزم کو گرفتار کرلیا۔بتایا گیا ہے کہ ڈسٹرکٹ پولیس آفیسر سیالکوٹ کیپٹن (ر) دوست محمد کی خصوصی ہدایات اور پیشہ ورانہ قیادت میں تھانہ سبز پیر پولیس نے قتل کے مقدمہ میں ملوث اشتہاری ملزم مقصود احمد ولد محمد اسلم رہائشی ضلع گجرات کو 27 سال بعد گرفتار کر کے بہت بڑی کامیابی حاصل کی ہے ۔پتہ چلا ہے کہ مقصود احمد نے 1999ء میں سیالکوٹ کے تھانہ سبز پیر کے علاقے گاؤں بینی برہمناں میں معمولی رنجش پر ایک شخص محمد صادق کو قتل کیا تھا جس کا مقدمہ مذکورہ تھانہ میں درج ہوا تھا جبکہ مقصود قتل کرنے کے بعد فرار ہو گیا اور مختلف شہروں میں اپنی شناخت و نام بدل کر رہ رہا تھا۔پولیس نے مخبری ہونے کی بناء پر ضلع گجرات میں جس جگہ مقصود رہ رہا تھا وہاں چھاپہ مار کر اس کو گرفتار کر لیا یہاں مقصود اپنے شناختی و دیگر دستاویزات تبدیل کر کے تیسری بیوی کے ہمراہ رہائش پذیر تھا۔پولیس نے مقصود کی گرفتاری کا عمل پورا کرنے کے بعد تفتیش شروع کر دی ہے۔