ٹائمز اسکوائر میں بینک آف امریکا کی نائب صدر ایرن سرعام ق ت ل، چاقو بردار خاتون پولیس فائرنگ سے ہلاک

نیویارک:امریکی شہر نیویارک کے انتہائی مصروف اور مشہور زمانہ تجارتی مرکز "ٹائمز اسکوائر” میں پیش آنے والے ایک خونی واقعے میں بینک آف امریکا کی نائب صدر ایرن پیاچینٹی (Erin Piacenti) چاقو کے حملے میں جاں بحق ہو گئی ہیں۔ اس لرزہ خیز واقعے نے امریکی مالیاتی اور سکیورٹی حلقوں میں شدید ہلچل مچا دی ہے۔
بلومبرگ نیوز اور غیرملکی خبر رساں ادارے کی رپورٹس کے مطابق، بینک آف امریکا کی نائب صدر ایرن پیاچینٹی کو پیر کے روز ٹائمز اسکوائر میں ایک مسلح خاتون نے اچانک چاقو کے پے در پے وار کر کے شدید زخمی کر دیا تھا۔ انہیں فوری طور پر قریبی اسپتال منتقل کیا گیا، جہاں وہ جانبر نہ ہو سکیں اور زخموں کی تاب نہ لاتے ہوئے دم توڑ گئیں۔
نیویارک سٹی کے میئر زُہران ممدانی نے واقعے کے فوری بعد ایک پریس بریفنگ میں انکشاف کیا کہ ایک خاتون، جو مبینہ طور پر متعدد چاقوؤں سے لیس تھی، نے ٹائمز اسکوائر میں بلااشتعال راہگیروں اور شہریوں کو نشانہ بنانا شروع کیا۔
نیویارک پولیس ڈیپارٹمنٹ کی کمشنر جیسیکا ٹش نے تفصیلات بتاتے ہوئے کہا کہ حملے کی اطلاع ملتے ہی پولیس موقع پر پہنچ گئی۔ پولیس اہلکاروں نے مشتبہ خاتون کو قابو کرنے کے لیے پہلے ‘ٹیزر’ (Taser) کا استعمال کیا، لیکن اس کے باوجود جب وہ خاتون ہاتھ میں چاقو لہراتی ہوئی مسلسل پولیس اہلکاروں کی طرف بڑھتی رہی، تو مجبوران پولیس کو جوابی فائرنگ کرنا پڑی جس کے نتیجے میں حملہ آور خاتون بھی ہلاک ہو گئی۔ پولیس کے مطابق ابتدائی تحقیقات سے ظاہر ہوتا ہے کہ یہ حملہ مکمل طور پر اچانک اور بلااشتعال کیا گیا تھا۔
اس اندوہناک واقعے پر بینک آف امریکا کی انتظامیہ نے گہرے رنج و غم کا اظہار کیا ہے۔ ای میل کے ذریعے جاری کردہ ایک باضابطہ بیان میں کمپنی نے کہا:
’’ہم اپنی ساتھی کے اس المناک انتقال پر شدید صدمے اور گہرے دکھ میں ہیں۔ وہ ہماری ٹیم کی ایک نہایت قابل قدر اور محنتی رکن تھیں، اور بینک میں ان کی خدمات کو ہمیشہ یاد رکھا جائے گا۔ ان کی کمی بہت محسوس ہوگی، اور اس مشکل گھڑی میں ہماری تمام تر ہمدردیاں اور دعائیں ان کے اہل خانہ اور عزیز و اقارب کے ساتھ ہیں۔‘‘