شاہدہ اسلام اسپتال، دنیاپور اور کہروڑ پکا روٹس پر چلنے والی ای بسوں کو عوامی سطح پر بے پناہ مقبولیت حاصل، اراکینِ اسمبلی کا اظہارِ تشکر
لاہور:وزیراعلیٰ پنجاب مریم نواز شریف سے لودھراں سے تعلق رکھنے والے اراکینِ صوبائی اسمبلی محمد زبیر خان اور شازیہ حیات نے ملاقات کی۔ اس ملاقات کے دوران سیاسی صورتحال، حلقے کے جاری ترقیاتی منصوبوں اور عوام کو درپیش مسائل کے حل کے حوالے سے تفصیلی تبادلہ خیال کیا گیا۔
اراکینِ اسمبلی نے وزیراعلیٰ کو اپنے حلقے کے عوامی مسائل سے آگاہ کیا، جس پر مریم نواز شریف نے انہیں ہدایت کی کہ وہ عوام کے مسائل کے حل کے لیے ہمہ وقت کوشاں رہیں اور ترقیاتی کاموں کی خود نگرانی کریں۔ اراکین نے ملتان وہاڑی روڈ کی تکمیل پر وزیراعلیٰ کو زبردست خراجِ تحسین پیش کیا۔
ملاقات کے دوران اراکینِ اسمبلی نے لودھراں میں الیکٹروبس سروس کے کامیاب آغاز پر عوامی جذبات سے آگاہ کرتے ہوئے وزیراعلیٰ کا شکریہ ادا کیا۔ انہوں نے بتایا کہ شاہدہ اسلام اسپتال، دنیاپور، کچہری چوک، میلاد چوک اور کہروڑ پکا کے روٹس پر چلنے والی الیکٹروبسیں اپنی افادیت اور بہترین سفری سہولیات کی وجہ سے عوامی مقبولیت کے نئے ریکارڈ قائم کر رہی ہیں۔
وزیراعلیٰ مریم نواز شریف نے گفتگو کرتے ہوئے اس عزم کا اعادہ کیا کہ پنجاب حکومت کی صحت سے جڑی فلاحی اسکیمیں اور ہیلتھ اینیشیٹوز عوام کے دلوں میں گھر کر چکے ہیں۔ انہوں نے کہا کہ پنجاب کے سرکاری اسپتالوں اور تعلیمی اداروں کی اعلیٰ سہولیات سے نہ صرف مقامی بلکہ دوسرے صوبوں سے آنے والے عوام بھی بھرپور استفادہ کر رہے ہیں۔ لاہور میں جناح انسٹیٹیوٹ آف کارڈیالوجی اور دیگر اضلاع میں کیتھ لیبز کا مکمل طور پر فعال ہونا اس بات کا ثبوت ہے کہ صحت کا شعبہ حکومت کی اولین ترجیح ہے۔
ٹیکنالوجی کے میدان میں ترقی کا ذکر کرتے ہوئے وزیراعلیٰ نے کہا کہ "پنجاب ای بز” اور "مریم کی دستک” پورٹلز کی بدولت صوبہ ڈیجیٹل سروسز میں قیادت کا کردار ادا کر رہا ہے، اور اب پنجاب حقیقی معنوں میں جدید ٹیکنالوجی اور ترقی کے دور میں داخل ہو چکا ہے۔