32 سالہ ’عام سی خاتون‘ مارگریٹا یوکرائن کی خفیہ ایجنسی کا اثاثہ نکلی ، حیرت انگیز تفصیلات منظر عام پر
سیاستو پول / ماسکو:روس کے زیرِ قبضہ کریمیا کی بندرگاہ سیاستو پول کے ایک پُرسکون رہائشی چوک میں اس وقت قیامت خیز دھماکہ ہوا جب روسی بحیرہ اسود کے فلیٹ کے ڈپٹی کمانڈر رابرٹ شگیف بحری یونیفارم میں وہاں سے گزر رہے تھے۔ کوڑے دان میں چھپایا گیا 500 گرام ٹی این ٹی کے برابر بم اس وقت پھٹا جب وہ اس کے قریب سے گزرے، اور وہ موقع پر ہی ہلاک ہو گئے۔
گارجین کی رپورٹ کے مطابق اس ہولناک ٹارگٹ کلنگ کے کچھ ہی گھنٹوں کے اندر روسی تحقیقاتی اداروں نے ایک سنسنی خیز گرفتاری عمل میں لاتے ہوئے 32 سالہ مارگریٹا ریوٹ (Margarita Reutt) کو حراست میں لے لیا، جو روس کے ریزورٹ شہر اسوچی کی رہائشی ہیں۔
روسی فیڈرل سکیورٹی سروس (FSB) کے مطابق، مارگریٹا نے تفتیش کے دوران اعتراف جرم کر لیا ہے کہ یوکرین کی انٹیلی جنس ایجنسی کے ایک ہینڈلر نے اسے اس کام کے بدلے کرپٹو کرنسی میں بڑی رقم اور روس چھوڑنے کے لیے جعلی دستاویزات دینے کا وعدہ کیا تھا۔ گرفتاری کے وقت اس کے پاس سے ریموٹ کنٹرول بھی برآمد ہوا ہے۔
عام سی زندگی سے دہشت گردی کے مشن تک کا حیرت انگیز سفر
مارگریٹا کی گرفتاری کے بعد اس کے دوستوں اور جاننے والوں پر سکتہ طاری ہے۔ جو لوگ اسے برسوں سے جانتے تھے، ان کے لیے یہ یقین کرنا محال ہے کہ بظاہر صحت مند اسپورٹس کی شوقین، جانوروں کے حقوق اور مہم جوئی کی شوقین یہ عام سی خاتون اتنی بڑی کارروائی کا حصہ بن سکتی ہے۔
بچپن سے ہی نڈر اور بہادر مانی جانے والی مارگریٹا نے نووسیبرسک میں پیراشوٹنگ کلب، واٹر پولو اور کو-کارٹنگ جیسے کھیلوں میں نام پیدا کیا۔ وہ ماضی میں سوویت فوجیوں کی باقیات تلاش کرنے والے ایک حب الوطن رضاکار گروپ کی بھی فعال رکن رہی تھی۔ تاہم، وقت کے ساتھ ساتھ اس کے خیالات میں تبدیلی آتی گئی۔ دوستوں کا کہنا ہے کہ روس کے یوکرین پر حملے کے بعد اس کا حکومتی پالیسیوں سے دل برداشتہ ہونا بڑھ گیا تھا۔
گزشتہ فروری میں اس نے سوشل میڈیا پر اپنے جینیاتی ٹیسٹ کے نتائج شیئر کرتے ہوئے ایک ہیش ٹیگ استعمال کیا تھا کہ اسے "روسی ہونے پر شرم آتی ہے”۔ اس کے علاوہ جنگ مخالف بیانات دینے پر اسے ٹرین میں جرمانہ بھی کیا گیا تھا۔
تازہ ترین اطلاعات کے مطابق، رواں سال کے آغاز سے ہی مارگریٹا کا رویہ تبدیل ہو چکا تھا۔ اس نے ایک برنرفون خرید رکھا تھا جس کے بارے میں وہ کہتی تھی کہ یہ کام کے لیے ہے، اور وہ اکثر ویڈیوز کی شوٹنگ کے بہانے کریمیا کے چکر لگاتی تھی۔
روس نے یوکرین پر الزام عائد کیا ہے کہ وہ اس قسم کے سویلینز اور عام شہریوں کو بڑی رقوم کا لالچ دے کر اپنی ہٹ لسٹ پر موجود عسکری شخصیات کے خلاف تخریبی کارروائیوں کے لیے استعمال کر رہا ہے۔
اگرچہ یوکرین نے اس معاملے پر فوری طور پر کوئی باضابطہ تبصرہ نہیں کیا، لیکن اس پراسرار اور سنسنی خیز واقعے نے ایک بار پھر جنگ کی اندھیری دنیا کے رازوں کو دنیا کے سامنے بے نقاب کر دیا ہے۔