لاہور، فیصل آباد، بھکر، ساہیوال اور گوجرانوالہ سمیت مختلف شہروں میں کارروائیاں،3,357 کومبنگ آپریشنز میں 274 مشتبہ گرفتار،
لاہور:پنجاب کے محکمہ انسدادِ دہشت گردی (سی ٹی ڈی) نے دہشت گردی کے ممکنہ خطرات اور مذموم عزائم کو ناکام بناتے ہوئے صوبے کے مختلف شہروں میں بڑے پیمانے پر انٹیلی جنس بیسڈ آپریشنز (IBOs) کیے ہیں۔ ترجمان سی ٹی ڈی کے مطابق سکیورٹی خدشات کے پیشِ نظر پنجاب کے مختلف اضلاع میں مجموعی طور پر 117 انٹیلی جنس بیسڈ آپریشنز کیے گئے، جن کے دوران 18 خطرناک دہشت گردوں کو دبوچ لیا گیا۔
ترجمان نے بتایا کہ یہ کامیاب کارروائیاں لاہور، فیصل آباد، بھکر، ساہیوال، حافظ آباد، گوجرانوالہ، ملتان، سیالکوٹ اور سرگودھا میں عمل میں لائی گئیں۔ گرفتار کیے جانے والے دہشت گردوں کی شناخت حسن عباس، حنیف، سمیع اللہ، حسنین، عطا، شہزاد اور بلال سمیت دیگر کے ناموں سے ہوئی ہے۔ ابتدائی تفتیش کے مطابق یہ عناصر مختلف مقامات پر تخریبی کارروائیاں کر کے عام شہریوں میں خوف و ہراس پھیلانا چاہتے تھے۔
حکام کے مطابق گرفتار دہشت گردوں کے قبضے سے بھاری مقدار میں اسلحہ، بارودی سامان، 8 ڈیٹونیٹرز، 5 فٹ طویل پرائمہ کارڈ، 13 فٹ حفاظتی فیوز وائر، ممنوعہ اسٹیکرز، متنازع کتابیں اور نقدی برآمد کی گئی ہے۔
ترجمان سی ٹی ڈی کا مزید کہنا تھا کہ دہشت گردوں اور ان کے سہولت کاروں کے خلاف گھیرا تنگ کرنے کے لیے روٹین آپریشنز بھی جاری ہیں۔ رواں ہفتے کے دوران صوبے بھر میں 3,357 کومبنگ آپریشنز کیے گئے جن میں 274 مشتبہ افراد کو حراست میں لیا گیا۔ ان آپریشنز کے دوران مجموعی طور پر 1,21,433 افراد سے اِنتظامی و سکیورٹی نوعیت کی پوچھ گچھ کی گئی۔
وزسی ٹی ڈی حکام نے اس عزم کا اعادہ کیا ہے کہ "محفوظ پنجاب” کے ہدف کو ہر صورت یقینی بنایا جائے گا اور دہشت گردی کے ناسور کو جڑ سے اکھاڑ پھینکنے کے لیے بلا تفریق کارروائیاں جاری رہیں گی۔