دوبندو چوکی میں محصور پولیس جوان بحفاظت پہنچ گئے، ایس ڈی پی او سرکل واڑی کی جانب سے پُرجوش استقبال

دیر بالا (بیورو چیف ریاض ابوالخیل)

دوبندو چوکی میں محصور پولیس کے بہادر جوان آج صبح بخیر و عافیت پولیس لائن دیر بالا پہنچ گئے۔ جوانوں کی بحفاظت واپسی پر ایس ڈی پی او سرکل واڑی جناب فخر عالم خان نے ان کا پُرجوش اور والہانہ استقبال کیا۔اس موقع پر ایس ڈی پی او سرکل واڑی فخر عالم خان نے جوانوں کے حوصلے، جرات اور بہادری کو خراجِ تحسین پیش کرتے ہوئے کہا:”آپ ہمارے فخر ہیں، آپ ہمارے ہیرو ہیں۔ آپ کی جرات، بہادری اور فرض سے وفاداری کو سلام ہے۔ آپ نے جس جذبے، عزم اور بہادری کے ساتھ مشکل حالات میں دشمن کا مقابلہ کیا، پوری قوم کو آپ پر فخر ہے۔”انہوں نے کہا کہ دیر پولیس کے جوانوں نے ایک بار پھر ثابت کر دیا کہ مشکل سے مشکل حالات میں بھی ان کے حوصلے بلند رہتے ہیں اور وہ عوام کے جان و مال کے تحفظ اور قیامِ امن کے لیے کسی بھی قربانی سے دریغ نہیں کرتے۔ایس ڈی پی او فخر عالم خان نے دیر بالا کے غیور عوام کا بھی خصوصی شکریہ ادا کیا اور کہا کہ موجودہ مشکل صورتحال میں جس طرح دیر کے عوام نے پولیس کا ساتھ دیا، حوصلہ بڑھایا اور پولیس کے شانہ بشانہ کھڑے رہے، وہ قابلِ تحسین اور قابلِ فخر ہے۔