پاکپتن رپورٹ سیداکرام حسین شاہ
جشنِ آزادی کی آمد آمد ہے، ملک بھر کی طرح پاکپتن میں بھی یومِ آزادی کی تیاریاں زور و شور سے جاری ہیں۔ شہر کے مختلف مقامات پر جشنِ آزادی کے حوالے سے خصوصی اسٹالز سج گئے ہیں، جہاں سبز ہلالی پرچم، جھنڈیاں، بیجز، ربن، بیلونز اور دیگر اشیاء شہریوں کی توجہ کا مرکز بنی ہوئی ہیں۔
پاکپتن میں جشنِ آزادی کے رنگ نمایاں ہونے لگے ہیں۔ بازاروں اور مختلف مقامات پر لگائے گئے اسٹالز پر سبز ہلالی پرچموں کی بہار ہے، کہیں چھوٹی بڑی جھنڈیاں فروخت ہو رہی ہیں تو کہیں قومی پرچم سے مزین بیجز، ربن اور دیگر آرائشی سامان شہریوں کو اپنی جانب متوجہ کر رہا ہے خصوصاً بچوں کے لیے جشنِ آزادی کے خصوصی ملبوسات بھی دستیاب ہیں۔ سبز و سفید رنگوں میں تیار کیے گئے پینٹ شرٹس، شلوار قمیص اور دیگر ملبوسات بچوں کی پسند بنے ہوئے ہیں، جبکہ والدین بھی اپنے بچوں کو یومِ آزادی کے موقع پر قومی رنگوں میں دیکھنے کے لیے خریداری میں مصروف ہیں جیسے جیسے چودہ اگست قریب آ رہی ہے، جشنِ آزادی کی خریداری میں بھی تیزی آ رہی ہے۔ شہری اپنے گھروں، دکانوں اور گاڑیوں کو قومی پرچموں اور جھنڈیوں سے سجانے کے لیے اسٹالز کا رخ کر رہے ہیں، جبکہ بچوں میں بھی سبز ہلالی پرچم والے بیجز، ٹوپیاں اور دیگر اشیاء کے حصول کا خاصا جوش و خروش نظر آ رہا ہے ملک بھر کی طرح پاکپتن میں بھی جشنِ آزادی کا جوش و جذبہ دیدنی ہے، اور شہری چودہ اگست کو بھرپور ملی جوش و جذبے کے ساتھ منانے کی تیاریوں میں مصروف ہیں۔
