سیالکوٹ:سلیم احمد اعوان شیخو
ڈپٹی کمشنر سیالکوٹ محمد اویس مشتاق کی زیر صدارت یوم آزادی پاکستان کی تقریبات اور 28 صفر المظفر کے موقع پر امام بارگاہ درِ بتول اڈہ پسروریاں سے برآمد ہونے والے جلوس کے انتظامات کے حوالے سے دو مختلف اجلاس منعقد ہوئے۔
یوم آزادی کے سلسلہ میں ڈپٹی کمشنر اویس مشتاق کی زیر صدارت منعقدہ اجلاس میں میونسپل کارپوریشن، ضلع کونسل اور ضلع کی چاروں تحصیلوں کے اسسٹنٹ کمشنرز نے شرکت کی۔ اجلاس میں 14 اگست کے حوالے سے ضلعی سطح پر منعقد ہونے والی تقریبات، سرکاری و عوامی مقامات پر قومی پرچم کشائی، عمارتوں کی تزئین و آرائش، صفائی ستھرائی، شہر کی خوبصورتی، لائٹنگ، ٹریفک مینجمنٹ، سکیورٹی اور دیگر انتظامات کا تفصیلی جائزہ لیا گیا۔
ڈپٹی کمشنر نے متعلقہ افسران کو ہدایت کی کہ وزیر اعلیٰ پنجاب مریم نواز شریف کے ویژن کے مطابق یوم آزادی کی تمام تقریبات کے انتظامات بروقت مکمل کئے جائیں۔ شہر بھر میں صفائی، خوبصورتی اور لائٹنگ کے خصوصی انتظامات یقینی بنائے جائیں جبکہ سرکاری عمارتوں اور اہم مقامات کو قومی پرچموں اور برقی قمقموں سے سجایا جائے۔
انہوں نے کہا کہ یوم آزادی محض ایک تہوار نہیں بلکہ پاکستان کے حصول کے لیے دی جانے والی لازوال قربانیوں کی یاد تازہ کرنے کا موقع ہے، اس لیے تقریبات میں قومی یکجہتی، حب الوطنی اور وطن عزیز سے محبت کے جذبے کو اجاگر کیا جائے۔ انہوں نے ہدایت کی کہ آزادی کی تقریبات میں شہریوں، بالخصوص نوجوانوں اور طلبہ کی بھرپور شرکت کو یقینی بنایا جائے۔
ڈپٹی کمشنر نے تمام اسسٹنٹ کمشنرز کو اپنی اپنی تحصیلوں میں تقریبات کے انتظامات کی ذاتی نگرانی کی ہدایت کرتے ہوئے کہا کہ میونسپل کارپوریشن اور ضلع کونسل صفائی، سجاوٹ، لائٹنگ اور دیگر بلدیاتی امور ترجیحی بنیادوں پر مکمل کریں۔
28 صفر کے جلوس شہادت امام حسن علیہ السلام کے سلسلہ میں ڈپٹی کمشنر اویس مشتاق نے ضلعی امن کور کمیٹی کے اراکین کے ہمراہ 28 صفر المظفر کے موقع پر امام بارگاہ درِ بتول اڈہ پسروریاں سے برآمد ہونے والے جلوس کے انتظامات کا جائزہ لیا۔ اجلاس میں جلوس کے روٹ، سکیورٹی، صفائی ستھرائی، ٹریفک مینجمنٹ، لائٹنگ، طبی سہولیات، داخلی و خارجی راستوں اور شرکاء کو فراہم کی جانے والی دیگر سہولیات کے حوالے سے تفصیلی بریفنگ دی گئی۔
ڈپٹی کمشنر اویس مشتاق نے کہا کہ اتحاد بین المسلمین وقت کی اہم ضرورت ہے، تمام مکاتب فکر کے علماء کرام معاشرے میں بھائی چارے، رواداری اور باہمی احترام کے فروغ کے لیے اپنا بھرپور کردار ادا کریں۔ انہوں نے کہا کہ سیالکوٹ میں مذہبی ہم آہنگی، امن اور بھائی چارے کی مضبوط روایت موجود ہے جسے برقرار رکھنا تمام طبقات کی مشترکہ ذمہ داری ہے۔
