لاہور، غازی آباد کیس میں ذہنی معذور لڑکی سے زیادتی کی میڈیکل رپورٹ بھی منظرعام پر آگئی

لاہور:غازی آباد پولیس اسٹیشن میں ذہنی معذور لڑکی سے مبینہ زیادتی کیس سے متعلق ابتدائی میڈیکل رپورٹ سامنے آگئی جس میں لڑکی کے ساتھ زیادتی کے شواہد نہیں ملے۔
ایکسپریس نیوز کے مطابق مبینہ زیادتی کے الزام میں گرفتار پولیس اہلکار عمران کا بیان بھی سامنے آگیا۔ پولیس اہلکار عمران کے مطابق لڑکی اپنے اہل خانہ کے ہمراہ بھیک مانگتی تھی، لڑکی اور اس کے اہل خانہ کو متعدد بار بھیک مانگنے سے روکا، بھیک مانگنے سے باز نہ آنے پر لڑکی کو ڈرانے کے لیے پولیس اسٹیشن لایا۔لڑکی کو کچھ دیر پولیس اسٹیشن میں رکھا، بعد ازاں رونے پر والدین کے پاس واپس بھیج دیا۔پولیس اہلکار کے بیان اور ابتدائی میڈیکل رپورٹ کی روشنی میں تحقیقات جاری ہیں، حتمی صورتحال فرانزک رپورٹ موصول ہونے کے بعد واضح ہوگی۔