بینکاک کےاسکول میں خونی کھیل، 14 سالہ طالب علم کی فائرنگ سے 8 ہ ل اک،

    بینکاک: تھائی لینڈ کے دارالحکومت بینکاک کے مضافات میں واقع ایک اسکول میں فائرنگ کا انتہائی لرزہ خیز واقعہ پیش آیا ہے، جہاں نویں جماعت کے ایک کم عمر طالب علم کی فائرنگ کے نتیجے میں کم از کم8افراد ہلاک ہو گئے ہیں۔ اس ہولناک واقعے نے ایک بار پھر ملک بھر میں خوف و ہراس اور اسلحے کی آسان دستیابی پر سنگین سوالات کھڑے کر دیے ہیں۔


    پولیس حکام کے مطابق نونتھابوری میں واقع نامور ’ڈیبسرین اسکول‘ (Debsirin School) میں پیش آنے والے اس واقعے کا مبینہ حملہ آور اسی اسکول کا 14 سالہ طالب علم تھا۔ ایک عینی شاہد نے انکشاف کیا کہ حملہ آور پستول ہاتھ میں لیے ایک کمرے سے دوسرے کمرے میں دندناتا پھرتا رہا اور اس نے ایک استاد کو بھی گولی کا نشانہ بنایا۔ مبینہ حملہ آور بعد میں جائے وقوعہ پر ہی مردہ حالت میں پایا گیا۔اس سے قبل مبینہ حملہ آور  اپنے دادا دادی کو بھی گولی مار چکا تھا۔


    واقعے کی اطلاع ملتے ہی ہنگامی امدادی ٹیمیں فوری طور پر موقع پر پہنچ گئیں، جہاں اسکول کے عملے اور معصوم طلبہ کو جان بچانے کے لیے خوف کے عالم میں بھاگتے ہوئے دیکھا گیا۔
    طبی عملے نے زخمیوں کو اسپتال منتقل کرنے سے قبل موقع پر ہی ابتدائی طبی امداد فراہم کی۔
    انتظامیہ نے عوام اور والدین سے اپیل کی ہے کہ وہ اسکول کے اطراف کے علاقے سے بالکل دور رہیں۔
    یاد رہے کہ ڈیبسرین اسکول کی شاخیں پورے تھائی لینڈ میں پھیلی ہوئی ہیں اور اسے تعلیمی وقار کے حوالے سے ایک معتبر مقام حاصل ہے۔
    تھائی لینڈ کے وزیراعظم انوتن چارنویراکل نے صحافیوں سے گفتگو کرتے ہوئے اس اندوہناک واقعے پر گہرے دکھ اور صدمے کا اظہار کیا ہے۔
    انہوں نے افسوس کا اظہار کرتے ہوئے کہا کہ "یہ واقعی بہت برا واقعہ ہے، ہمارے ملک میں ایسا کیسے ہو سکتا ہے؟” انہوں نے مزید کہا کہ اسی وجہ سے حکومت عام شہریوں کو آتشیں اسلحہ رکھنے کی اجازت نہیں دیتی۔ واضح رہے کہ رواں سال فروری میں بھی جنوبی تھائی لینڈ کے ایک اسکول میں فائرنگ کا ایسا ہی واقعہ پیش آ چکا ہے جس کے بعد سے ملک میں اسلحے کے قوانین پر شدید بحث جاری ہے۔

    Related Posts