” سب فیک نیوز ہے“ پولز جعلی میری مقبولیت تاریخی ہے، پاپولیریٹی میں کمی پر صدر ٹرمپ کا برہمی کا اظہار

    واشنگٹن ڈی سی :امریکی صدر ڈونلڈ ٹرمپ نے اپنی عوامی مقبولیت میں کمی دکھانے والے تمام حالیہ جائزوں (پولز) کو یکسر مسترد کرتے ہوئے عزم ظاہر کیا ہے کہ ان کی مقبولیت تاریخ کی بہترین اور بلند ترین سطح پر ہے۔ اپنے سوشل میڈیا پلیٹ فارم ‘ٹروتھ سوشل’ پر جاری ایک بیان میں انہوں نے ان انتخابی سروے کو جھوٹے اور من گھڑت میڈیا کی کارستانی قرار دیا ہے۔
    ٹرمپ صدر ٹرمپ نے اپنی اعلیٰ مقبولیت کی وجہ اپنی حکومت کے شاندار کارناموں کو قرار دیا، جن میں ٹیکسوں میں بڑی چھوٹ، روزگار کی تاریخی شرح، ریکارڈ غیر ملکی سرمایہ کاری، سخت سرحدی نگرانی کے ساتھ ساتھ وینزویلا میں کامیابی اور ایران کے جوہری پروگرام کا خاتمہ شامل ہیں۔ انہوں نے مڈ ٹرم انتخابات میں ووٹرز سے ریپبلکن پارٹی کو ووٹ دینے کی پرزور اپیل بھی کی ہے۔


    ٹرمپ کے یہ دعوے ایک ایسے وقت میں سامنے آئے ہیں جب اکثر قومی پولز ان کی مقبولیت میں نمایاں کمی کی نشاندہی کر رہے ہیں۔ حالیہ جائزوں کے مطابق ان کی کارکردگی سے مطمئن افراد کی شرح 40 فیصد سے کم ہو چکی ہے، جبکہ سی این این، اے پی-نارک اور کوئنی پیک جیسے معروف اداروں کے انفرادی پولز میں ان کی مقبولیت محض 32 سے 34 فیصد کے درمیان دکھائی گئی ہے، جہاں اکثریت نے ان کی پالیسیوں پر عدم اطمینان کا اظہار کیا ہے۔
    یہ تنازع ایسے وقت میں شدت اختیار کر گیا ہے جب کانگریس کے مڈ ٹرم انتخابات میں چند ماہ باقی رہ گئے ہیں، جنہیں صدر ٹرمپ اور ریپبلکن پارٹی کی بقا اور سیاسی مستقبل کا سب سے بڑا امتحان سمجھا جا رہا ہے۔ قومی سطح کے حالیہ سروے ڈیموکریٹس کو معمولی برتری ملنے کا اشارہ دے رہے ہیں، تاہم ٹرمپ ماضی کی طرح ایک بار پھر ان پولز کی درستگی کو چیلنج کرتے ہوئے انہیں زمینی حقائق کے منافی قرار دے رہے ہیں۔

    Related Posts