سری نگر :مقبوضہ کشمیر میں پیپلز ڈیموکریٹک پارٹی (پی ڈی پی) اور اپنی پارٹی جیسی اپوزیشن جماعتیں دفعہ 370 اور 35 اے کی منسوخی کی ساتویں برسی کے موقع پر پانچ اگست کو احتجاج کی تیاری کر رہی ہیں، جبکہ حکمران نیشنل کانفرنس (این سی) نے ابھی تک اس دن کے لیے اپنے پروگرام کو حتمی شکل نہیں دی ہے۔
پی ڈی پی اور اپنی پارٹی نے وادی میں احتجاجی مظاہروں کا اعلان کیا ہے۔ پی ڈی پی کی صدر محبوبہ مفتی نے دفعہ 370 کی منسوخی کی ساتویں برسی پر پانچ اگست کو جموں و کشمیر کے تمام اضلاع میں پُرامن احتجاج کا اعلان کیا ہے۔
یادرہے بھارتیہ جنتا پارٹی (بی جے پی) کی زیر قیادت مودی حکومت نے پانچ اگست 2019 کو دفعہ 370 اور 35 اے منسوخ کیا تھا۔ ان دفعات کے تحت جموں و کشمیر کو خصوصی آئینی حیثیت حاصل تھی اور یہاں کے رہائشیوں کو ریاستی باشندہ ہونے سے متعلق خصوصی حقوق حاصل تھے۔ اسی روز سابق ریاست جموں و کشمیر کو دو حصوں میں بھی تقسیم کر کے جموں و کشمیر اور لداخ کو الگ الگ مرکزی زیر انتظام علاقے بنا دیا گیا تھا۔
